ભારતીય સંગીત જગતના લોકપ્રિય ગાયક અરિજીત સિંહે પ્લેબેક સિંગિંગમાંથી અચાનક નિવૃત્તિ જાહેર કરીને સૌને ચોંકાવી દીધા છે. 27 Januaryની રાત્રે સોશિયલ મીડિયા પર પોતાની પોસ્ટ દ્વારા આ જાણકારી આપતા ગાયકે જણાવ્યું કે તેઓ એકસરખા કામ અને ધૂનથી કંટાળી ગયા છે. જોકે, આ આકસ્મિક નિર્ણય પાછળ માત્ર કંટાળો જ નહીં પરંતુ તેમનો મૂલાંક પણ જવાબદાર હોવાનું અંકશાસ્ત્રીઓ માની રહ્યા છે.
કેતુના પ્રભાવ હેઠળનો મૂલાંક 7
જ્યોતિષાચાર્ય અનીષ વ્યાસના વિશ્લેષણ મુજબ અરિજીત સિંહનો મૂલાંક 7 છે. અંકશાસ્ત્રમાં 7 નંબર પર કેતુ ગ્રહનું આધિપત્ય ગણાય છે. જે વ્યક્તિઓનો જન્મ કોઈપણ મહિનાની 7, 16 અથવા 25 તારીખે થયો હોય તેમનો મૂલાંક 7 બને છે. આવા લોકો અત્યંત સંવેદનશીલ હોય છે અને દુનિયા શું વિચારશે તેની પરવા કર્યા વગર પોતાના મનનું ધાર્યું કરતા હોય છે. કેતુને શાસ્ત્રોમાં 'સરવિહીન' માનવામાં આવે છે, જેના કારણે આ અંકના જાતકો મગજ કરતા હૃદયથી વધુ નિર્ણયો લેતા હોય છે.
રહસ્યમય અને દૃઢ નિશ્ચયી સ્વભાવ
અરિજીત સિંહના વ્યક્તિત્વમાં મૂલાંક 7ના લક્ષણો સ્પષ્ટપણે દેખાય છે. આવા લોકો બાહ્ય દુનિયામાં દેખાડો કરવાનું પસંદ કરતા નથી અને પોતાની અંગત જિંદગીને ગુપ્ત રાખવાનું પસંદ કરે છે. તેઓ સારા પ્લાનર હોય છે પરંતુ પોતાની યોજનાઓ સફળ ન થાય ત્યાં સુધી કોઈની સાથે વહેંચતા નથી. સંગીત જગત ભલે આ નિર્ણયને નિવૃત્તિ તરીકે જોતું હોય, પરંતુ જ્યોતિષીય દૃષ્ટિકોણથી આ તેમની ભવિષ્યની કોઈ મોટી યોજનાનો ભાગ હોઈ શકે છે.
લાગણીશીલ હોવાથી લીધો નિર્ણય
અંકશાસ્ત્ર મુજબ મૂલાંક 7 ધરાવતા લોકો ખૂબ જ જલ્દી ભાવુક થઈ જતા હોય છે. તેઓ પોતાની આંતરિક શાંતિને અન્ય તમામ વસ્તુઓ કરતા વધુ મહત્વ આપે છે. અરિજીત સિંહમાં જોવા મળતી સાદગી અને અચાનક બધું છોડી દેવાની આ વૃત્તિ પાછળ કેતુનો પ્રભાવ હોવાનું મનાય છે. તેઓ કોઈના પડછાયામાં રહેવાને બદલે પોતાની અલગ ઓળખ અને ભવિષ્યની તૈયારીઓ પર વધુ ધ્યાન કેન્દ્રિત કરે છે.
