અનુપમ ખેરે મિત્રને આપેલું વચન નિભાવ્યું : દિવંગત સતીશ કૌશિકની દીકરીના 'વાલી' બની સ્કૂલ ફંક્શનમાં પહોંચ્યા, વંશિકાને જોઈ થઈ ગયા ભાવુક

Bollywood Friendshi: બોલિવૂડમાં મિત્રતાના અનેક ઉદાહરણો જોવા મળે છે, પરંતુ પીઢ અભિનેતા અનુપમ ખેરે દિવંગત અભિનેતા સતીશ કૌશિક સાથેની પોતાની મિત્રતાને જે રીતે નિભાવી છે, તેણે સૌકોઈના દિલ જીતી લીધા છે. સતીશ કૌશિકના નિધન બાદ અનુપમ ખેરે તેમના પરિવારની જવાબદારી સંભાળવાનું અને તેમની પુત્રી વંશિકાના માર્ગદર્શક બનવાનું જે વચન આપ્યું હતું, તે તેઓ પૂરી નિષ્ઠાથી નિભાવી રહ્યા છે. તાજેતરમાં જ વંશિકાના સ્કૂલ ફંક્શનમાં અનુપમ ખેર એક જવાબદાર વાલી (Guardian) બનીને પહોંચ્યા હતા, જેની તસવીરો સોશિયલ મીડિયા પર વાયરલ થઈ રહી છે.

વંશિકાના શાળાના કાર્યક્રમમાં હાજરી આપીને અનુપમ ખેરે સાબિત કર્યું છે કે, સાચી મિત્રતા માત્ર જીવિત વ્યક્તિ સાથે જ નહીં, પરંતુ તેમના ગયા પછી તેમના પરિવાર સાથે પણ અકબંધ રહે છે. વંશિકાએ સ્કૂલમાં આયોજિત એક નુક્કડ નાટકમાં ભાગ લીધો હતો, જ્યાં તેને સ્ટેજ પર પર્ફોર્મ કરતી જોઈને અનુપમ ખેર ભાવુક થઈ ગયા હતા. તેમણે આ ગૌરવશાળી ક્ષણને સોશિયલ મીડિયા પર શેર કરી મિત્રતાની નવી પરિભાષા લખી છે.

સ્કૂલ ફંક્શનમાં વાલી બની પહોંચ્યા અનુપમ ખેર

અનુપમ ખેરે પોતાની ઇન્સ્ટાગ્રામ પોસ્ટ દ્વારા આ ખાસ પળની વિગતો શેર કરતા લખ્યું કે, વંશિકાને સ્કૂલના નાટકમાં અભિનય કરતી જોવી એ તેમના જીવનની સૌથી સુખદ ક્ષણોમાંની એક હતી. જ્યારે વંશિકા સ્ટેજ પર પર્ફોર્મ કરી રહી હતી, ત્યારે અનુપમ ખેર એક ગૌરવ અનુભવતા પિતા કે વાલીની જેમ પ્રેક્ષકોમાં બેસીને તેને પ્રોત્સાહિત કરી રહ્યા હતા. તેમણે જણાવ્યું કે વંશિકાનો આત્મવિશ્વાસ અને તેની મહેનત ખરેખર પ્રશંસનીય છે.

નુક્કડ નાટકે અપાવી સતીશ કૌશિક સાથેના જૂના દિવસોની યાદ

વંશિકાએ જ્યારે સ્ટ્રીટ પ્લે એટલે કે નુક્કડ નાટકમાં ભાગ લીધો, ત્યારે અનુપમ ખેરને તેમના સંઘર્ષના દિવસો યાદ આવી ગયા હતા. તેમણે ભાવુક થઈને જણાવ્યું કે, "ઘણા વર્ષો પહેલા હું અને સતીશ દિલ્હીની શેરીઓમાં સાથે મળીને આવા જ નુક્કડ નાટકો કરતા હતા. આજે વંશિકાને તે જ ભૂમિકામાં જોવી એ મારા માટે જૂની યાદો તાજી કરવા જેવું હતું." તેમણે વંશિકાને એક ટેલેન્ટેડ અને મહેનતુ અભિનેત્રી તરીકે પણ બિરદાવી હતી.

વચન પાળ્યું: સતીશ કૌશિકના નિધન બાદ સતત સાથે છે અનુપમ

9 માર્ચ 2023ના રોજ દિલ્હીમાં કાર્ડિયાક અરેસ્ટને કારણે સતીશ કૌશિકનું અચાનક અવસાન થયું હતું. તેમના નિધનના સમાચાર પણ અનુપમ ખેરે જ દુનિયા સાથે શેર કર્યા હતા. તે સમયે તેમણે વચન આપ્યું હતું કે તેઓ વંશિકાનો સાથ ક્યારેય નહીં છોડે. ત્યારથી લઈને અત્યાર સુધી, અનુપમ ખેર અવારનવાર વંશિકા સાથે લંચ પર જાય છે, તેની સાથે વીડિયો બનાવે છે અને તેની નાની-મોટી દરેક ખુશીમાં સામેલ થાય છે.

અનુપમ ખેરનો વર્ક ફ્રન્ટ

અભિનયની વાત કરીએ તો, અનુપમ ખેર ટૂંક સમયમાં ૨૦૦૬ની સુપરહિટ ફિલ્મ 'ખોસલા કા ઘોસલા'ની સિક્વલ 'ખોસલા કા ઘોસલા ૨'માં જોવા મળશે. આ ઉપરાંત, તેઓ સાઉથના સુપરસ્ટાર પ્રભાસ સાથે ફિલ્મ 'ફૌજી'માં પણ એક મહત્વની ભૂમિકા ભજવતા નજર આવશે.