Anniqa Jamal : પાકિસ્તાન પોતાના 73 વર્ષના ઇતિહાસમાં પહેલીવાર પ્રતિષ્ઠિત મિસ વર્લ્ડ સૌંદર્ય સ્પર્ધામાં સત્તાવાર રીતે ભાગ લેવા જઈ રહ્યું છે. મિસ વર્લ્ડની 75મી વર્ષગાંઠ નિમિત્તે યોજાનારી આગામી સ્પર્ધામાં 24 વર્ષની અનિકા જમાલ પાકિસ્તાનનું પ્રતિનિધિત્વ કરશે. લાહોરમાં આયોજિત સમારોહમાં તેમને સત્તાવાર રીતે 'મિસ વર્લ્ડ પાકિસ્તાન 2026'નો તાજ પહેરાવવામાં આવ્યો હતો. આ નિર્ણય માત્ર સૌંદર્ય સ્પર્ધા સુધી મર્યાદિત નથી, પરંતુ પાકિસ્તાન માટે સામાજિક અને સાંસ્કૃતિક રીતે પણ એક મહત્વપૂર્ણ ઘટના માનવામાં આવી રહી છે. પાકિસ્તાનમાં સૌંદર્ય સ્પર્ધાઓ અને મોડેલિંગને લઈને વર્ષોથી મતભેદો જોવા મળ્યા છે. રૂઢિચુસ્ત અને કટ્ટરપંથી ધાર્મિક જૂથો આવા કાર્યક્રમોનો વિરોધ કરતા આવ્યા છે. આવી પરિસ્થિતિમાં મિસ વર્લ્ડ જેવા વૈશ્વિક મંચ પર પાકિસ્તાનની સત્તાવાર ભાગીદારી દેશ માટે એક નવા અધ્યાયની શરૂઆત તરીકે જોવામાં આવી રહી છે.
અનિકા જમાલ કોણ છે?
24 વર્ષની અનિકા જમાલ માત્ર મોડેલ જ નહીં પરંતુ ઉચ્ચ શિક્ષિત યુવા મહિલા પણ છે. તેઓ હાલમાં એકાઉન્ટિંગ અને ઓડિટિંગ વિષયમાં માસ્ટર્સનો અભ્યાસ કરી રહ્યા છે. આંતરરાષ્ટ્રીય બ્યુટી પેજન્ટ્સનો તેમને સારો અનુભવ છે અને અગાઉ પણ તેઓ અનેક વૈશ્વિક સ્પર્ધાઓમાં પાકિસ્તાનનું પ્રતિનિધિત્વ કરી ચૂક્યા છે. અનિકા અગાઉ મિસ અર્થ, મિસ ગ્લોબલ, મિસ કોસ્મો, મિસ ઇકો ઇન્ટરનેશનલ અને મિસ ઓરા ઇન્ટરનેશનલ જેવી આંતરરાષ્ટ્રીય સ્પર્ધાઓમાં ભાગ લઈ ચૂક્યા છે. ઉપરાંત, કોસોવોમાં યોજાયેલી 'મિસ ફ્રીડમ ઓફ ધ વર્લ્ડ' સ્પર્ધામાં તેમણે ચાર અલગ-અલગ ખિતાબ જીત્યા હતા, જેના કારણે તેમને આંતરરાષ્ટ્રીય સ્તરે પણ ઓળખ મળી છે.
આ પણ ખાસ વાંચો : મજબૂત એર ડિફેન્સ છતાં ઈરાનની મિસાઈલ કેમ નથી રોકી શકતું અમેરિકા? : સામે આવ્યો ચોંકાવનારો દાવો
મિસ વર્લ્ડના મંચ પરથી સામાજિક સંદેશ આપવાનો સંકલ્પ
અનિકા જમાલનું કહેવું છે કે તેઓ મિસ વર્લ્ડના વૈશ્વિક મંચનો ઉપયોગ માત્ર સૌંદર્ય સ્પર્ધા પૂરતો નહીં પરંતુ સામાજિક મુદ્દાઓ માટે પણ કરવા માંગે છે. ખાસ કરીને પાકિસ્તાનમાં થેલેસેમિયા જેવા ગંભીર રોગથી પીડાતા દર્દીઓ માટે જાગૃતિ ફેલાવવી અને તેમના માટે વધુ સહયોગ તથા સમર્થન ઊભું કરવું તેમનું મુખ્ય લક્ષ્ય છે. થેલેસેમિયા પાકિસ્તાન સહિત દક્ષિણ એશિયાના અનેક દેશોમાં ગંભીર જાહેર આરોગ્યનો મુદ્દો માનવામાં આવે છે. અનિકા માને છે કે આંતરરાષ્ટ્રીય મંચ પરથી આ વિષયને વધુ પ્રભાવશાળી રીતે રજૂ કરી શકાય છે, જેથી દર્દીઓ અને તેમના પરિવારોને મદદ મળી શકે.
પાકિસ્તાન માટે કેમ છે ઐતિહાસિક ક્ષણ?
પાકિસ્તાને અત્યાર સુધી ક્યારેય સત્તાવાર રીતે મિસ વર્લ્ડ સ્પર્ધામાં ભાગ લીધો નહોતો. જોકે વર્ષ 2002માં સ્થાપિત 'મિસ પાકિસ્તાન વર્લ્ડ ઓર્ગેનાઇઝેશન' છેલ્લા બે દાયકાથી પાકિસ્તાની મહિલાઓને વિવિધ આંતરરાષ્ટ્રીય બ્યુટી પેજન્ટ્સ માટે તૈયાર કરતી આવી છે. હવે પ્રથમ વખત મિસ વર્લ્ડમાં સત્તાવાર પ્રતિનિધિત્વ મળતા સંસ્થાએ તેને દેશ માટે ગૌરવની ક્ષણ ગણાવી છે. સંસ્થાના વડા સોનિયા અહેમદે જણાવ્યું કે મિસ વર્લ્ડમાં પાકિસ્તાનની ભાગીદારી માત્ર એક સ્પર્ધામાં પ્રવેશ નથી, પરંતુ વૈશ્વિક મંચ પર પાકિસ્તાની મહિલાઓની પ્રતિભા, આત્મવિશ્વાસ અને ક્ષમતાને રજૂ કરવાની મહત્વપૂર્ણ તક છે. તેમના મતે પાકિસ્તાની મહિલાઓ વિવિધ આંતરરાષ્ટ્રીય ક્ષેત્રોમાં સતત પોતાની પ્રતિભા સાબિત કરી રહી છે.
આ પણ ખાસ વાંચો : અમેરિકાની બેઠકમાં ભારતનો વિરોધ : માર્કો રૂબિયોના નિવેદન પર તરત જ નોંધાવી આપત્તિ
વિશ્લેષકોનું માનવું છે કે મિસ વર્લ્ડમાં પાકિસ્તાનની એન્ટ્રીને દેશમાં મિશ્ર પ્રતિસાદ મળી શકે છે. એક તરફ તેને મહિલાઓ માટે વૈશ્વિક તક તરીકે જોવામાં આવી રહી છે, તો બીજી તરફ રૂઢિચુસ્ત વર્ગોમાં તેનો વિરોધ પણ થઈ શકે છે. જોકે અનિકા જમાલ માટે આ માત્ર વ્યક્તિગત સિદ્ધિ નહીં પરંતુ આંતરરાષ્ટ્રીય મંચ પર પોતાના દેશનું પ્રતિનિધિત્વ કરવાની ઐતિહાસિક જવાબદારી પણ છે. આગામી મિસ વર્લ્ડ સ્પર્ધામાં અનિકા જમાલનું પ્રદર્શન અને પાકિસ્તાનની પ્રથમ સત્તાવાર ભાગીદારી પર વિશ્વભરના લોકોની નજર રહેશે.
