Digital Arrest Scam: અમદાવાદમાં સાયબર ઠગાઈનો એક મોટો કેસ સામે આવ્યો છે, જેમાં અમદાવાદ સાયબર ક્રાઇમ પોલીસે સમયસર કાર્યવાહી કરીને એક વૃદ્ધના અંદાજે 1.43 કરોડ રૂપિયા બચાવી લીધા છે. આ કેસમાં સાયબર માફિયાઓએ વૃદ્ધને “ડિજિટલ અરેસ્ટ” ના નામે ડરાવી ધમકાવી મોટી રકમ હડપવાનો પ્રયાસ કર્યો હતો.
મળતી માહિતી મુજબ, અમદાવાદમાં એકલા રહેતા અને માલેતૂજાર એવા સિનિયર સિટીઝનને ફોન અને વોટ્સએપ કોલ દ્વારા સંપર્ક કરવામાં આવ્યો હતો. સાયબર ઠગોએ પોતાને ઈડી (ED) અને અન્ય તપાસ એજન્સીના અધિકારી તરીકે ઓળખાવી જણાવ્યું કે જેટ એરવેઝના નરેશ ગોયલ કેસમાં તેમના આધારકાર્ડનો ઉપયોગ થયો છે. આ બહાને વૃદ્ધ કાકાને “ડિજિટલ અરેસ્ટ” કરવામાં આવ્યા હોવાની ધમકી આપવામાં આવી હતી. છેલ્લા સાત દિવસથી સાયબર માફિયાઓ તેમને સતત ડરાવી રહ્યા હતા અને માત્ર બેંક તથા મ્યુચ્યુઅલ ફંડમાંથી પૈસા ઉપાડવાની જ છૂટ આપતા હતા.
આ દરમિયાન વૃદ્ધ કાકા મ્યુચ્યુઅલ ફંડમાંથી આશરે 93 લાખ રૂપિયા ઉપાડવા માટે મ્યુચ્યુઅલ ફંડ ડિસ્ટ્રીબ્યુટર પલક દોશી પાસે પહોંચ્યા હતા. એક સાથે મોટી રકમ ઉપાડવાની વાત, ગભરાયેલું વર્તન અને તાત્કાલિક પૈસાની માંગ જોઈને પલક દોશીને શંકા ગઈ. પૂછપરછ દરમિયાન કાકાએ ગોળ ગોળ જવાબ આપ્યા અને કોઈ મેડિકલ ઈમરજન્સી પણ ન હોવાનું સામે આવ્યું. બાદમાં તેમના મોબાઇલમાં ઈડીના નામની ઇમેજ દેખાતા ડિજિટલ અરેસ્ટની શંકા વધુ મજબૂત બની.
પલક દોશીએ તરત જ અમદાવાદ સાયબર ક્રાઇમ પોલીસનો સંપર્ક કર્યો. માહિતી મળતાં જ પોલીસ હરકતમાં આવી અને સિનિયર સિટીઝનના ઘરે પહોંચી. તે સમયે વૃદ્ધ કાકા બેંકમાં એફડી ઉપાડવા ગયા હોવાનું જાણવા મળતાં પોલીસ તાત્કાલિક બેંક પહોંચી અને રૂપિયા વિથડ્રો થતી અટકાવી. બાદમાં વૃદ્ધનું કાઉન્સેલિંગ કરવામાં આવ્યું. શરૂઆતમાં તેઓ ડિજિટલ અરેસ્ટ થયાની વાત માનવા તૈયાર ન હતા, પરંતુ પુરાવા બતાવ્યા બાદ સત્ય સામે આવ્યું.
સાયબર ક્રાઇમ પોલીસ અને મ્યુચ્યુઅલ ફંડ ડિસ્ટ્રીબ્યુટરની સતર્કતાના કારણે વૃદ્ધના કરોડો રૂપિયા બચી ગયા. પોલીસે ફરી એકવાર ચેતવણી આપી છે કે ડિજિટલ અરેસ્ટ નામે કોઈ કાયદાકીય કાર્યવાહી નથી અને કોઈપણ તપાસ એજન્સી ફોન કે વોટ્સએપ દ્વારા પૈસાની માંગ કરતી નથી. નાગરિકોને સતર્ક રહેવા અને શંકાસ્પદ પરિસ્થિતિમાં તાત્કાલિક સાયબર ક્રાઇમ પોલીસનો સંપર્ક કરવા અપીલ કરવામાં આવી છે.
