Ahmedabad Municipal Corporation (AMC) ની સ્ટેન્ડિંગ કમિટીની બેઠકમાં શહેરના વિકાસ માટે મોટા નિર્ણયો લેવામાં આવ્યા છે. કમિટીના ઇતિહાસમાં પ્રથમ વખત એક જ દિવસે લગભગ 2500 કરોડ રૂપિયાના વિવિધ વિકાસ કાર્યોને મંજૂરી આપવામાં આવી છે. રોડ-રસ્તા, બ્રિજ, ડ્રેનેજ, પાણી પુરવઠા અને હેલ્થ વિભાગ સહિતના અનેક પ્રોજેક્ટ્સને લીલી ઝંડી આપવામાં આવી છે.
બેઠકમાં સૌથી મહત્વનો નિર્ણય Subhash Bridge અંગે લેવામાં આવ્યો છે. બ્રિજમાં તિરાડો દેખાતા તેને સુરક્ષિત બનાવવા માટે સુપર સ્ટ્રક્ચર તોડી નવા બનાવવાનો નિર્ણય લેવાયો છે. સાથે જ સબ સ્ટ્રક્ચરને વધુ મજબૂત બનાવવામાં આવશે. હાલના બ્રિજનું રિપેરિંગ કામ અંદાજે નવ મહિનામાં પૂર્ણ થશે અને ત્યારબાદ બ્રિજ ફરી ટ્રાફિક માટે ખુલ્લો મુકવામાં આવશે.
અધિકારીઓના જણાવ્યા મુજબ, બ્રિજના રિપેરિંગ અને નવા બ્રિજના નિર્માણ માટે કુલ અંદાજે 236 કરોડ રૂપિયાનું ખર્ચ થશે. રિપેરિંગ પૂર્ણ થયા બાદ બાજુમાં નવા લેન અને નવા બ્રિજના નિર્માણનું કામ હાથ ધરવામાં આવશે, જેથી શહેરમાં ટ્રાફિકની સમસ્યા ઘટાડવામાં મદદ મળશે.
આ ઉપરાંત શહેરના South Bopal વિસ્તારમાં વિશાળ લોટસ ગાર્ડન બનાવવાનો મહત્વપૂર્ણ પ્રોજેક્ટ પણ મંજૂર કરવામાં આવ્યો છે. આ ગાર્ડન માટે લગભગ 115 કરોડ રૂપિયાનો ખર્ચ થશે. આ ગાર્ડનમાં દેશભરના વિવિધ પ્રકારના ફૂલ અને છોડ લગાવવામાં આવશે, જે અમદાવાદ માટે નવું આકર્ષણ બનશે.
ઉલ્લેખનીય છે કે 9 માર્ચે AMCના સત્તાધીશોની ટર્મ પૂર્ણ થવાની હોવાથી આ બેઠક છેલ્લી સ્ટેન્ડિંગ કમિટી તરીકે યોજાઈ હતી. બેઠકના અંતે કમિટીના ચેરમેને તમામ સભ્યોનો આભાર વ્યક્ત કર્યો હતો. શહેરના વિકાસ માટે મોટા પ્રોજેક્ટ્સને મંજૂરી મળતા આગામી સમયમાં અમદાવાદમાં ઇન્ફ્રાસ્ટ્રક્ચર વિકાસને વધુ ગતિ મળવાની શક્યતા વ્યક્ત કરવામાં આવી રહી છે.
