દક્ષિણ આફ્રિકા વર્લ્ડ ટેસ્ટ ચેમ્પિયન : એડન માર્કરમ યાદગાર સદી ફટકારી

દક્ષિણ આફ્રિકાએ ICC વર્લ્ડ ટેસ્ટ ચેમ્પિયનશિપ (WTC)નો ખિતાબ જીત્યો છે. લંડનના ઐતિહાસિક લોર્ડ્સ ક્રિકેટ ગ્રાઉન્ડ ખાતે રમાયેલી ફાઇનલમાં દક્ષિણ આફ્રિકાએ ઓસ્ટ્રેલિયાને 5 વિકેટે હરાવ્યું હતું. આ મેચમાં દક્ષિણ આફ્રિકાને જીતવા માટે 282 રનનો લક્ષ્યાંક મળ્યો હતો. આ લક્ષ્યાંક દક્ષિણ આફ્રિકાએ ચોથા દિવસે (14 જૂન) લંચ પહેલા પ્રાપ્ત કરી લીધો હતો.

દક્ષિણ આફ્રિકાએ એડન માર્કરમની સદીની મદદથી ઓસ્ટ્રેલિયાને હરાવીને વર્લ્ડ ટેસ્ટ ચેમ્પિયનશિપ (WTC)નો ખિતાબ જીત્યો. ડિફેન્ડિંગ ચેમ્પિયન ઓસ્ટ્રેલિયાએ દક્ષિણ આફ્રિકા માટે 282 રનનો લક્ષ્યાંક રાખ્યો હતો, પરંતુ દક્ષિણ આફ્રિકાએ પાંચ વિકેટે 285 રન બનાવીને જીત મેળવી. ટેસ્ટમાં દક્ષિણ આફ્રિકાનો આ ત્રીજો સૌથી મોટો સફળ રન ચેઝ છે. આ સાથે, દક્ષિણ આફ્રિકાની ટીમ પહેલી વાર WTCનો વિજેતા બની છે, જ્યારે ઓસ્ટ્રેલિયન ટીમ ટાઇટલનો બચાવ કરી શકી નથી. પ્રથમ ઇનિંગમાં લીડ લેવા છતાં ઓસ્ટ્રેલિયન ટીમ ચેમ્પિયન બનવાથી ચૂકી ગઈ.

દક્ષિણ આફ્રિકાએ 27 વર્ષના દુષ્કાળનો અંત લાવ્યો

દક્ષિણ આફ્રિકાએ 27 વર્ષના અંતરાલ પછી ICC ટાઇટલ જીત્યું છે. ટીમે છેલ્લે 1998માં નોકઆઉટ ટ્રોફી (હવે ચેમ્પિયન્સ) જીતી હતી. ટેમ્બા બાવુમાની આગેવાની હેઠળની ટીમે આ ટાઇટલ દુષ્કાળનો અંત લાવ્યો અને લોર્ડ્સના મેદાન પર ઐતિહાસિક જીત નોંધાવી. દક્ષિણ આફ્રિકાની જીતમાં કેપ્ટન બાવુમા અને એડન એડન માર્કરમનું યોગદાન ખૂબ જ મહત્વપૂર્ણ હતું. આ બંને બેટ્સમેનોએ ત્રીજી વિકેટ માટે 147 રનની ભાગીદારી કરી અને ટીમની જીતનો પાયો નાખ્યો.

લોર્ડ્સમાં પાંચમી વખત 200+ રનના લક્ષ્યનો પીછો

ટેસ્ટમાં દક્ષિણ આફ્રિકાનો સૌથી સફળ રન ચેઝ ઓસ્ટ્રેલિયા સામે હતો. 2008 માં પર્થમાં રમાયેલી તે મેચમાં દક્ષિણ આફ્રિકાએ 414 રનનો લક્ષ્યાંક હાંસલ કર્યો હતો. આ ટીમ સામે, તેણે 2002 માં ડરબનમાં 335 રનનો લક્ષ્યાંક પણ પ્રાપ્ત કર્યો છે. હવે દક્ષિણ આફ્રિકાએ ઓસ્ટ્રેલિયા સામે તેની ટેસ્ટ કારકિર્દીનો ત્રીજો સફળ રન ચેઝ કર્યો છે. લોર્ડ્સના મેદાન પર આ સંયુક્ત બીજા ક્રમનો સૌથી મોટો રન ચેઝ પણ છે. આ પાંચમી વખત છે જ્યારે આ મેદાન પર ટેસ્ટમાં 200+ રનનો લક્ષ્યાંક પ્રાપ્ત થયો છે.

લીડ લેવા છતાં ઓસ્ટ્રેલિયા હારી ગયું

ઓસ્ટ્રેલિયાનો બીજો દાવ ત્રીજા દિવસે 207 રનમાં સમેટાઈ ગયો. ટોસ હાર્યા બાદ પહેલા બેટિંગ કરતા ઓસ્ટ્રેલિયાએ પોતાની પહેલી ઇનિંગમાં 212 રન બનાવ્યા. જવાબમાં, દક્ષિણ આફ્રિકાનો પહેલો દાવ 138 રનમાં સમેટાઈ ગયો. ઓસ્ટ્રેલિયાને પ્રથમ ઇનિંગના આધારે 74 રનની લીડ મળી હતી. આ રીતે, ઓસ્ટ્રેલિયાની કુલ લીડ 281 રન થઈ ગઈ. જવાબમાં, દક્ષિણ આફ્રિકાએ પીછેહઠ સાથે શરૂઆત કરી. રાયન રિકેલ્ટન ફક્ત 6 રન બનાવી શક્યો. તેને મિશેલ સ્ટાર્કે પોતાનો શિકાર બનાવ્યો. તે જ સમયે, વિઆન મુલ્ડર ફક્ત 27 રન બનાવી શક્યો. તેને પણ સ્ટાર્કે પેવેલિયન મોકલ્યો. 70 ના સ્કોર પર બે વિકેટ ગુમાવી દેનારી પ્રોટીઝ ટીમને મોટી ભાગીદારીની જરૂર હતી. એડન માર્કરામે ટેમ્બા બાવુમા સાથે સદીની ભાગીદારી કરી અને વિજયનો પાયો નાખ્યો.

દક્ષિણ આફ્રિકાની બીજી ઇનિંગ

દક્ષિણ આફ્રિકાએ ચોથા દિવસની શરૂઆત 213 રનથી કરી હતી, પરંતુ ટીમે શનિવારે વહેલી તકે બાવુમાની વિકેટ ગુમાવી દીધી, જે 134 બોલમાં 66 રન બનાવીને આઉટ થયા હતા. પેટ કમિન્સે બાવુમાને પોતાનો શિકાર બનાવ્યો. ત્યારબાદ ટ્રિસ્ટન સ્ટબ્સને પણ સ્ટાર્ક દ્વારા બોલ્ડ કરવામાં આવ્યા અને આઠ રન બનાવીને પેવેલિયન પરત ફર્યા. જોકે, માર્કરામ મક્કમ રહ્યો અને ટીમને વિજયના ઉંબરે પહોંચાડી દીધો. પરંતુ તે મેચ પૂરી કરી શક્યો નહીં અને જોશ હેઝલવુડને પોતાની વિકેટ ગુમાવી દીધી. 207 બોલમાં 14 ચોગ્ગાની મદદથી 136 રન બનાવ્યા બાદ એડન માર્કરમ આઉટ થયો. ડેવિડ બેડિંગહામ અને કાયલ વેરેને આખરે મેચ પૂરી કરી અને દક્ષિણ આફ્રિકાના ટાઇટલ દુકાળનો અંત લાવ્યો. એડન માર્કરમને તેની શાનદાર ઇનિંગ માટે પ્લેયર ઓફ ધ મેચનો એવોર્ડ મળ્યો.

WTC ચેમ્પિયન બનનારી ત્રીજી ટીમ

બેડિંગહામ 21 રન અને વેરેન ચાર રન સાથે અણનમ પરત ફર્યા. ઓસ્ટ્રેલિયા માટે સ્ટાર્કે બીજી ઇનિંગમાં ત્રણ વિકેટ લીધી, જ્યારે હેઝલવુડ અને કમિન્સે એક-એક વિકેટ લીધી. દક્ષિણ આફ્રિકાની ટીમ WTC વિજેતા બનનારી ત્રીજી ટીમ છે. અગાઉ, ન્યુઝીલેન્ડ અને ઓસ્ટ્રેલિયા આ ટાઇટલ જીતી ચૂક્યા છે. દક્ષિણ આફ્રિકાએ આ રીતે ICC ટાઇટલ જીતવાના 27 વર્ષના દુકાળનો અંત લાવ્યો છે.