આજના ભાગદોડભર્યા અને વ્યસ્ત જીવનમાં નાની-નાની આદતો આપણા સ્વાસ્થ્ય પર મોટી અસર કરે છે. ખોટો ખોરાક, બેઠાડુ જીવન અને તણાવને કારણે ગેસ, એસિડિટી અને કબજિયાત જેવી સમસ્યાઓ હવે સામાન્ય બની ગઈ છે. આવી સ્થિતિમાં, જો તમે તમારા દિવસની શરૂઆત એક સાદા પાણીને બદલે એક ખાસ 'હેલ્ધી ડ્રિંક' થી કરો, તો તે તમારા વેલનેસ રૂટિનનો સૌથી મહત્વનો ભાગ બની શકે છે. સ્વાસ્થ્ય નિષ્ણાતો અને નેશનલ હેલ્થ મિશન (NHM) ના સૂચનો મુજબ, વરિયાળી, અજમો અને તજનું મિશ્રણ સ્વાસ્થ્ય માટે વરદાન સમાન છે. આ ત્રણેય મસાલા આપણા રસોડામાં સરળતાથી મળી રહે છે, પરંતુ જ્યારે તેને યોગ્ય રીતે સવારે ખાલી પેટે લેવામાં આવે ત્યારે તે આખા શરીરને ડિટોક્સ (Detox) કરવાનું કામ કરે છે. તે માત્ર પાચનતંત્રને જ સુધારે છે એવું નથી, પણ બ્લડ શુગર કંટ્રોલ કરવાથી લઈને વજન ઘટાડવા સુધીના અનેક ફાયદાઓ આપે છે. ચાલો જાણીએ આ જાદુઈ ડ્રિંક બનાવવાની રીત અને તેનાથી થતા અદભૂત ફાયદાઓ વિશે.
કેવી રીતે તૈયાર કરશો આ હેલ્ધી ડ્રિંક?
આ ડ્રિંક બનાવવાની પદ્ધતિ અત્યંત સરળ છે:
રાત્રે સૂતા પહેલા એક ગ્લાસ પાણી લો.
તેમાં એક નાની ચમચી વરિયાળી, અડધી ચમચી અજમો અને તજનો એક નાનો ટુકડો નાખીને પલાળી રાખો.
સવારે ઉઠીને આ પાણીને હળવું ગરમ (નવશેકું) કરો.
ત્યારબાદ તેને ગાળીને ધીમે-ધીમે ઘૂંટડે-ઘૂંટડે પી લો.
પાચનતંત્ર માટે રામબાણ ઈલાજ
આ ડ્રિંક તમારા પેટની દરેક સમસ્યાનો અંત લાવી શકે છે. વરિયાળી ગેસ, બ્લોટિંગ (પેટ ફૂલવું) અને એસિડિટીમાં રાહત આપે છે. અજમો પેટના દુખાવા અને કબજિયાતને દૂર કરવામાં મદદરૂપ થાય છે. જ્યારે તજ પાચનક્રિયાને વેગ આપે છે. નિયમિત સેવનથી મેટાબોલિઝમ તેજ બને છે, જે વજન ઘટાડવામાં પણ મદદ કરે છે.
બ્લડ શુગર અને ઈમ્યુનિટીમાં ફાયદો
તજમાં એવા ગુણો હોય છે જે બ્લડ શુગર લેવલને નિયંત્રિત કરવામાં મદદ કરે છે, જે ડાયાબિટીસના દર્દીઓ માટે ખૂબ જ ગુણકારી છે. વરિયાળી અને તજ એન્ટી-ઓક્સિડન્ટથી ભરપૂર હોય છે, જે શરીરમાં સોજો (Inflammation) ઘટાડે છે અને રોગપ્રતિકારક શક્તિ એટલે કે ઈમ્યુનિટીમાં વધારો કરે છે.
મહિલાઓ અને ત્વચા માટે વરદાન
મહિલાઓ માટે આ ડ્રિંક ખાસ ફાયદાકારક છે કારણ કે, તે હોર્મોનલ બેલેન્સ જાળવવામાં મદદ કરે છે અને માસિક ધર્મ (Periods) દરમિયાન થતા દુખાવામાં રાહત આપે છે. આ ઉપરાંત, શરીરના ઝેરી તત્વો (Toxins) બહાર નીકળવાને કારણે ત્વચા પર કુદરતી ચમક આવે છે અને ખીલની સમસ્યા ઓછી થાય છે. આમ, આ ડ્રિંક માત્ર શરીર જ નહીં પણ મનને પણ તાજગી આપે છે. વરિયાળી અને અજમાનો સુગંધિત સ્વાદ તણાવ ઘટાડવામાં મદદ કરે છે, જ્યારે તજ મગજને સક્રિય રાખવામાં અને યાદશક્તિ વધારવામાં મદદરૂપ સાબિત થાય છે.
