Bhabi Ji Ghar Par Hai 2.0: ટીવીના લોકપ્રિય કોમેડી શો 'ભાભીજી ઘર પર હૈ'ના ચાહકો માટે મોટી ખુશખબર છે. શોનું નવું સીઝન 'ભાભીજી ઘર પર હૈ 2.0' ટૂંક સમયમાં &TV પર પ્રસારિત થવાનું છે, અને તેનો નવો પ્રોમો રિલીઝ થયો છે. આ પ્રોમોમાં મુખ્ય આકર્ષણ છે ઓરિજિનલ અંગૂરી ભાભી એટલે કે અભિનેત્રી શિલ્પા શિંદેની ધમાકેદાર વાપસી. લગભગ 9-10 વર્ષ પછી શિલ્પા ફરી અંગૂરી ભાભીના રોલમાં જોવા મળશે, જેને જોઈને ચાહકો ખૂબ ઉત્સાહિત છે.
નવા સીઝનમાં 'સ્ત્રી' જેવો ટ્વિસ્ટ
નવા પ્રોમો અનુસાર, આ વખતે શોની વાર્તા ઘૂંઘટગંજ નામના ગામમાં આધારિત છે, જ્યાં મહિલાઓ ઘૂંઘટમાં રહીને સંસ્કારી જીવન જીવે છે. અહીં એક જૂની અંગ્રેજી હવેલી છે, જેની માલકિન મનમોહન તિવારીની મૌસી છે. તે તિવારીને હવેલી અને સંપત્તિ સોંપવા તૈયાર છે, પરંતુ શરત છે કે તિવારીની પત્ની મૉડર્ન હોવી જોઈએ.
અંગૂરી ભાભી તો ભોળી અને પરંપરાગત છે, તેથી તિવારી વિભૂતિ નારાયણ મિશ્રા સાથે પત્નીઓની અદલા-બદલી કરે છે. હવે તિવારીની પત્ની ગોરી મેમ (અનિતા ભાભી) બને છે, જે મૉડર્ન છે, અને વિભૂતિની પત્ની અંગૂરી ભાભી. બંને કપલ ઘૂંઘટગંજ પહોંચે છે, પરંતુ ત્યાંની સંસ્કારી મહિલાની મૂર્તિ અને રહસ્યમય વાતાવરણથી મુશ્કેલીઓ વધે છે. પ્રોમોમાં 'સ્ત્રી' ફિલ્મ જેવો હૉરર-કોમેડી ટ્વિસ્ટ જોવા મળે છે, જેમાં ભૂતિયા અને મનોરંજક તત્વોનું મિશ્રણ છે.
શિલ્પા શિંદેની વાપસીઃ ચાહકો માટે ખાસ ભેટ
શિલ્પા શિંદેએ 2015માં શોની શરૂઆતમાં અંગૂરી ભાભીના રોલથી ઘર-ઘરમાં પ્રખ્યાતિ મેળવી હતી. તેમના ભોળપણ અને અંગ્રેજીના મજાકિયા ઉચ્ચારણે દર્શકોને હસાવ્યા હતા. પરંતુ મેકર્સ સાથે વિવાદને કારણે તેમણે શો છોડી દીધો હતો, અને તેમની જગ્યાએ શુભાંગી અત્રેએ રોલ કર્યો હતો.
હવે લગભગ એક દાયકા પછી શિલ્પા શિંદે પાછી આવી રહી છે. તેમણે એક ઇન્ટરવ્યૂમાં કહ્યું કે તેઓ ક્યારેય વિચારતા ન હતા કે ફરી અંગૂરી ભાભી બનશે, પરંતુ ઑફર મળતાં જ તરત હા પાડી દીધી. મેકર્સ સાથેના જૂના વિવાદોને ભૂલીને તેઓ આગળ વધી રહ્યા છે. સેટ પર જૂની કાસ્ટે તેમનું હાર્દિક સ્વાગત કર્યું છે. શિલ્પા કહે છે કે, આ વખતે પાત્રને જૂની રીતે જ નિભાવવું પડકારજનક છે, પરંતુ તેઓ ઉત્સાહિત છે.'ભાભીજી ઘર પર હૈ 2.0' 22 ડિસેમ્બરથી &TV પર શરૂ થશે. આ શોમાં આસિફ શેખ (વિભૂતિ), રોહિતાશ્વ ગૌર (તિવારી) અને વિદિશા શ્રીવાસ્તવ (અનિતા ભાભી) પણ પોતાના રોલમાં છે. કોમેડી સાથે હૉરરનો તડકો લગાવતો આ નવો સીઝન દર્શકોને ખૂબ મનોરંજન આપશે તેવી આશા છે. ચાહકો પહેલેથી જ 'સહી પકડે હૈ' કહીને ઉત્સાહ વ્યક્ત કરી રહ્યા છે!
