IndiGo Flight Bomb Threat: કુવૈતથી દિલ્હી જતી ઇન્ડિગો એરલાઇન્સની ફ્લાઇટમાં બોમ્બ અને હાઇજેકની ધમકી મળતાં શુક્રવારે સવારે મોટો સુરક્ષા ખળભળાટ મચી ગયો હતો. વિમાનમાંથી એક ટિશ્યુ પેપર પર હાથથી લખેલી ધમકીભરી નોટ મળી આવતાં પાઇલટે તાત્કાલિક એર ટ્રાફિક કંટ્રોલને જાણ કરી અને વિમાનને અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર ઇમરજન્સી લેન્ડિંગ કરાવ્યું.
અમદાવાદ એરપોર્ટ પર લેન્ડિંગ
વિમાનમાં 180 મુસાફરો સવાર હતા. તે સલામત રીતે સવારે આશરે 6:40 વાગ્યે અમદાવાદ એરપોર્ટ પર ઉતર્યું. લેન્ડિંગ બાદ તમામ મુસાફરોને સુરક્ષિત બહાર કાઢવામાં આવ્યા અને તેમની તેમજ તેમના સામાનની સંપૂર્ણ તપાસ કરવામાં આવી. બોમ્બ ડિટેક્શન એન્ડ ડિસ્પોઝલ સ્ક્વોડ (BDDS) દ્વારા વિમાનની પણ ઝીણવટભરી તપાસ કરવામાં આવી, જેમાં અત્યાર સુધીમાં કોઈ શંકાસ્પદ વસ્તુ મળી નથી.
ધમકીની નોટમાં વિમાનને હાઇજેક કરીને બોમ્બથી ઉડાવી દેવાની વાત કરવામાં આવી હતી. આ ઘટના બાદ એરપોર્ટ પર સુરક્ષા એજન્સીઓ સક્રિય થઈ ગઈ અને તપાસ ચાલુ છે. ફ્લાઇટ દિલ્હી પહોંચવામાં આશરે 2 કલાક મોડી પડી શકે છે.
પહેલાં પણ ધમકીઓ મળી હતી
આ પહેલાં પણ તાજેતરમાં ઇન્ડિગોની અનેક ફ્લાઇટ્સને આવી જ બોમ્બ ધમકીઓ મળી હતી. 18 જાન્યુઆરીએ દિલ્હીથી બાગડોગરા જતી ફ્લાઇટને ધમકી મળતાં તેને લખનઉમાં ડાયવર્ટ કરવામાં આવી હતી, જ્યારે 22 જાન્યુઆરીએ દિલ્હી-પુણે ફ્લાઇટમાં શૌચાલયમાં નોટ મળી હતી અને તેને પણ સુરક્ષિત ઉતારવામાં આવ્યું હતું. સુરક્ષા પ્રોટોકોલ મુજબ તમામ પગલાં લેવામાં આવ્યા છે અને તપાસ ચાલુ રહેશે.
