T20 World Cup 2024 Final, IND vs NZ: ક્રિકેટ પ્રેમીઓ જેની આતુરતાથી રાહ જોઈ રહ્યા હતા તે ક્ષણ હવે આવી ગઈ છે. અમદાવાદના નરેન્દ્ર મોદી સ્ટેડિયમમાં ડિફેન્ડિંગ ચેમ્પિયન ભારત અને શાનદાર ફોર્મમાં ચાલી રહેલી ન્યુઝીલેન્ડની ટીમ વચ્ચે T20 વર્લ્ડ કપ 2026ની મહાજંગ ખેલાશે. ભારત પાસે સતત બીજી વાર વર્લ્ડ કપ જીતીને ઈતિહાસ રચવાની સુવર્ણ તક છે, પરંતુ ન્યુઝીલેન્ડનો પડકાર જરાય ઓછો નથી.
શું ભારત બદલશે પ્લેઈંગ-11?
ફાઈનલ જેવી હાઈ-વોલ્ટેજ મેચ પહેલા ભારતની પ્લેઈંગ ઈલેવનને લઈને અનેક અટકળો વહેતી થઈ છે. ખાસ કરીને ઓપનર અભિષેક શર્મા અને સ્પિનર વરુણ ચક્રવર્તીના ફોર્મને લઈને ચર્ચાઓ જાગી છે.
અભિષેક શર્મા: દુનિયાના નંબર વન બેટ્સમેન હોવા છતાં છેલ્લી કેટલીક મેચોમાં તે અપેક્ષા મુજબનું પ્રદર્શન કરી શક્યા નથી. જોકે, ટીમ મેનેજમેન્ટ તેમની વિસ્ફોટક ક્ષમતા પર વિશ્વાસ મૂકીને તેમને ટીમમાં યથાવત રાખે તેવી પૂરેપૂરી શક્યતા છે.
વરુણ ચક્રવર્તી vs કુલદીપ યાદવ: બોલિંગ વિભાગમાં વરુણ ચક્રવર્તીની જગ્યાએ અનુભવી ચાઈનામેન બોલર કુલદીપ યાદવને તક મળી શકે છે. અમદાવાદની પિચને ધ્યાનમાં રાખીને કુલદીપ ઘાતક સાબિત થઈ શકે છે.
ન્યુઝીલેન્ડ: 'બેસ્ટ ફોર્મ' માં કિવી ટીમ
ન્યુઝીલેન્ડે સેમીફાઈનલમાં દક્ષિણ આફ્રિકાને જે રીતે હરાવ્યું છે, તેનાથી ભારતીય કેમ્પમાં ચોક્કસપણે સાવચેતીનો માહોલ હશે. ફિન એલનની આક્રમક સદી અને ટિમ સીફર્ટની ફિફ્ટી કિવી ટીમને મજબૂતી આપી રહી છે. ન્યુઝીલેન્ડની ટીમમાં ફેરફારની શક્યતા નહિવત છે. ભારત પાસે સતત બે T20 વર્લ્ડ કપ જીતનારી વિશ્વની પ્રથમ ટીમ બનવાની તક છે. સૂર્યકુમાર યાદવની કેપ્ટન્સી અને બુમરાહની ઘાતક બોલિંગ પર ભારતનો દારોમદાર રહેશે. જોકે, રચિન રવિન્દ્ર અને મિશેલ સેન્ટનર જેવા ઓલરાઉન્ડરોથી સજ્જ કિવી ટીમને હરાવવી ભારત માટે લોઢાના ચણા ચાવવા જેવું સાબિત થઈ શકે છે.
ભારતની સંભવિત પ્લેઇંગ 11:
સંજુ સેમસન, અભિષેક શર્મા, ઈશાન કિશન, સૂર્યકુમાર યાદવ, તિલક વર્મા, હાર્દિક પંડ્યા, શિવમ દુબે, અક્ષર પટેલ, અર્શદીપ સિંહ, વરુણ ચક્રવર્તી/કુલદીપ યાદવ, જસપ્રિત બુમરાહ.
ન્યૂઝીલેન્ડની સંભવિત પ્લેઇંગ 11:
ટિમ સીફર્ટ (વિકેટકીપર), ફિન એલન, રચિન રવિન્દ્ર, ગ્લેન ફિલિપ્સ, માર્ક ચેપમેન, ડેરિલ મિશેલ, જેમ્સ નીશમ, મિશેલ સેન્ટનર (કેપ્ટન), કોલ મેકકોન્ચી, મેટ હેનરી, લોકી ફર્ગ્યુસન.
