Bhutadi Amavasya 2026: હિન્દુ ધર્મમાં અમાસની તિથિ અત્યંત શક્તિશાળી માનવામાં આવે છે, પરંતુ તેમાં પણ ચૈત્ર મહિનાની અમાસનું વિશેષ મહત્વ છે, જેને લોકભાષામાં 'ભૂતડી અમાસ' તરીકે ઓળખવામાં આવે છે. વર્ષ 2026માં આ અમાસ 19 માર્ચના રોજ આવી રહી છે. પૌરાણિક માન્યતાઓ અનુસાર, આ દિવસે બ્રહ્માંડમાં અદ્રશ્ય અને નકારાત્મક શક્તિઓનો પ્રભાવ ખૂબ જ વધી જતો હોય છે. 'ભૂતડી' શબ્દનો સંબંધ સૂક્ષ્મ શક્તિઓ સાથે છે, જે આ દિવસે પૃથ્વી પર વધુ સક્રિય થાય છે. આ જ કારણ છે કે આ દિવસે પિતૃ તર્પણ અને રક્ષણાત્મક ઉપાયો કરવાનું વિશેષ વિધાન છે.
જ્યોતિષશાસ્ત્ર મુજબ, જ્યારે સૂર્ય અને ચંદ્ર એક જ રાશિમાં હોય ત્યારે અમાસ બને છે, જેના કારણે ચંદ્રનું બળ નબળું પડે છે અને માનસિક સ્થિતિ પર અસર થઈ શકે છે. ભૂતડી અમાસના દિવસે પિતૃલોકના દ્વાર ખુલે છે અને પિતૃઓને પૃથ્વી પર આવવાની તક મળે છે. જો પિતૃઓ અતૃપ્ત હોય તો જીવનમાં મુશ્કેલીઓ વધી શકે છે. તેથી, આ દિવસે શ્રદ્ધાપૂર્વક કરેલા ઉપાયો માત્ર ખરાબ નજરથી જ નથી બચાવતા, પરંતુ ગ્રહ પીડા અને પિતૃદોષમાંથી પણ મુક્તિ અપાવે છે. ચાલો જાણીએ આ દિવસે કયા કામ કરવા જોઈએ અને કેવી રીતે નકારાત્મકતાથી બચવું.
નકારાત્મક શક્તિઓથી બચવાના અચૂક ઉપાયો
ભૂતડી અમાસના દિવસે અદ્રશ્ય શક્તિઓ વધુ પ્રભાવી હોવાથી શાસ્ત્રોમાં કેટલાક રક્ષણાત્મક ઉપાયો સૂચવવામાં આવ્યા છે. આ દિવસે હનુમાન ચાલીસાના પાઠ કરવા અથવા મહામૃત્યુંજય મંત્રનો જાપ કરવો અત્યંત ફળદાયી માનવામાં આવે છે. હનુમાનજીને સંકટમોચન માનવામાં આવે છે, તેથી તેમની આરાધના કરવાથી કોઈ પણ પ્રકારની મેલી વિદ્યા કે નકારાત્મક ઉર્જા ઘર કે વ્યક્તિને સ્પર્શી શકતી નથી.
સ્નાન-દાન અને પિતૃ તર્પણનું મહત્વ
આ દિવસે સવારે સ્નાન કરતી વખતે પાણીમાં કાળા તલ નાખીને સ્નાન કરવું જોઈએ અથવા પવિત્ર નદી કે તીર્થસ્થાન પર જઈ સ્નાન કરવું ઉત્તમ છે. સ્નાન બાદ પિતૃઓનું તર્પણ કરવાથી અતૃપ્ત આત્માઓને શાંતિ મળે છે અને તેમના આશીર્વાદ પ્રાપ્ત થાય છે. જે લોકોના જીવનમાં સતત અવરોધો આવતા હોય અથવા માનસિક અશાંતિ રહેતી હોય, તેમણે આ દિવસે ગરીબોને અનાજ કે વસ્ત્રોનું દાન અવશ્ય કરવું જોઈએ.
જ્યોતિષીય દ્રષ્ટિકોણ અને સાધના
જ્યોતિષમાં આ તિથિને સાધકો અને તાંત્રિકો માટે વિશેષ માનવામાં આવે છે. ચંદ્રની શક્તિ નબળી હોવાને કારણે આ સમય સૂક્ષ્મ ઉર્જાના પ્રભાવમાં વધારો કરે છે. આ દિવસે ઘરના ઉંબરે દીવો પ્રગટાવવો અને રાત્રિના સમયે નિર્જન સ્થળોએ જવાનું ટાળવું જોઈએ. આ શિસ્તબદ્ધ પાલન કરવાથી વ્યક્તિ અને તેનું પરિવાર સુરક્ષિત રહે છે અને પિતૃઓની કૃપાથી ઘરમાં સુખ-શાંતિ જળવાઈ રહે છે.
