જો તમે સાચા અમદાવાદી હોવ અને રવિવારે સાબરમતીના તટ પર લટાર ન મારી હોય, તો માની લો કે તમે શહેરના ધબકારને મિસ કરી રહ્યા છો. એલિસબ્રિજ પાસે ભરાતું ‘રવિવારી બજાર’ (જેને ગુજરી બજાર પણ કહેવાય છે) માત્ર એક ફ્લી માર્કેટ નથી, પણ અમદાવાદના 6 સદી જૂના વારસાનું જીવંત સંગ્રહાલય છે.
બાદશાહ અહમદશાહની દેન: 1414 થી આજ સુધી
આ બજારનો ઇતિહાસ શહેર જેટલો જ જૂનો છે. અમદાવાદના સ્થાપક અહમદશાહ બાદશાહે 1414માં આ બજારની શરૂઆત કરાવી હતી. તે સમયે આ બજાર ભદ્રના કિલ્લા પાસે શુક્રવારે ભરાતું હતું, જેને ‘ખાસ બજાર’ અથવા ‘શુક્રવારી’ તરીકે ઓળખવામાં આવતું. વિદેશી વેપારીઓ પણ અહીં પોતાનો માલ વેચવા આવતા હતા. સમય જતાં 1954 માં આ બજાર સાબરમતીના કાંઠે સ્થાયી થયું અને રવિવારે ભરાવાનું શરૂ થતા તેનું નામ ‘રવિવારી’ પડ્યું.
સોયથી લઈને તલવાર સુધી: શું મળે છે અહીં?
રવિવારી બજાર વિશે કહેવાય છે કે અહીં એવી કોઈ વસ્તુ નથી જે ન મળે!
એન્ટિક વસ્તુઓ: જૂના સિક્કા, ગ્રામોફોન, ટાઈપરાઈટર અને પિત્તળના વાસણો.
ઘરવખરી: રસોડાના સાધનો, ચપ્પાથી લઈને જૂના જમાનાની તલવારો.
લાઈફસ્ટાઈલ: કપડાં, જિમના સાધનો, મેકઅપની કિટ અને ઇલેક્ટ્રોનિક ગેજેટ્સ.
ખાસ આકર્ષણ: અહીં જૂના પુસ્તકો અને રેર ફર્નિચરનો એવો ખજાનો મળે છે જે તમને મોટા મોલમાં પણ નહીં જોવા મળે.
રવિવારી બજાર અલ્લાદિનના ચિરાગથી ઓછુ બિલકુલ પણ નથી, જો તમારી પાસે આ બે વસ્તુ હોય:
વસ્તુ પારખવાની કળા: ઢગલાબંધ સામાનમાંથી અસલી હીરો શોધી કાઢવાની નજર.
મોલભાવ (Bargaining) કરવાની તાકાત: જો તમે ભાવતાલ કરવામાં હોંશિયાર છો, તો તમે અહીંથી અદભૂત ડીલ મેળવી શકો છો.
મુલાકાતીઓ માટે જરૂરી વિગતો
ક્યારે: દર રવિવારે (સવારે 7:00 થી સાંજે 6:00 સુધી).
ક્યાં: સાબરમતી રિવરફ્રન્ટ, એલિસબ્રિજ પાસે, રાયખડ, અમદાવાદ.
અમદાવાદની આ વિરાસત આજે પણ તેની રોનક ટકાવી રાખીને ઊભી છે. આ રવિવારે જો તમારે પણ ઇતિહાસને નજીકથી જોવો હોય અને સસ્તામાં સારો સામાન ખરીદવો હોય, તો ગુજરી બજારની મુલાકાત લેવાનું ચૂકતા નહીં!
