Vastu Tips for Money: ઘણા લોકો ફરિયાદ કરતા હોય છે કે તેઓ દિવસ-રાત મહેનત તો ખૂબ કરે છે અને કમાણી પણ સારી છે, છતાં મહિનાના અંતે બચતના નામે 'શૂન્ય' હોય છે. ક્યારેક અચાનક બીમારી પાછળ તો ક્યારેક બિનજરૂરી ખર્ચમાં પૈસા પાણીની જેમ વહી જાય છે. વાસ્તુશાસ્ત્ર અનુસાર, આ માટે માત્ર તમારી કિસ્મત જવાબદાર નથી હોતી, પરંતુ તમારી રોજિંદી કેટલીક આદતો પણ જવાબદાર હોય છે. આપણી આસપાસની ઉર્જા આપણા આર્થિક જીવન પર સીધી અસર કરે છે. જો ઘરમાં વાસ્તુ દોષ હોય અથવા આપણી રહેણીકરણી શાસ્ત્રોક્ત ન હોય, તો લક્ષ્મીજી ક્યારેય સ્થિર રહેતા નથી.
જાણો વાસ્તુશાસ્ત્રમાં દર્શાવેલી એવી કઈ ભૂલો છે જે વ્યક્તિને ધીમે-ધીમે આર્થિક રીતે પાયમાલ કરી શકે છે અને તેનાથી બચવા માટે કયા ઉપાયો કરવા જોઈએ.
1. જમવાની થાળીમાં હાથ ધોવાની આદત
મોટાભાગના લોકો જમી લીધા પછી તે જ થાળીમાં હાથ ધોઈ નાખતા હોય છે. વાસ્તુશાસ્ત્ર અને હિન્દુ ધર્મમાં આને અન્નનું ઘોર અપમાન માનવામાં આવે છે. એવું માનવામાં આવે છે કે આ આદતથી ઘરમાં દરિદ્રતા આવે છે અને લક્ષ્મીજી નારાજ થઈ જાય છે. તેનાથી ઘરમાં ક્યારેય પૈસા ટકતા નથી અને ફાલતુ ખર્ચ વધવા લાગે છે.
2. બંધ પડેલી ઘડિયાળ રાખવી
ઘડિયાળ એ સમય અને પ્રગતિનું પ્રતીક છે. જો તમારા ઘરમાં કોઈ ઘડિયાળ બંધ હાલતમાં પડી હોય અથવા સેલ ખતમ થઈ ગયો હોય, તો તે તમારા જીવનની ગતિને પણ રોકી શકે છે. બંધ ઘડિયાળ નકારાત્મક ઉર્જા પેદા કરે છે, જે તમારી આર્થિક ઉન્નતિમાં અવરોધ ઊભો કરે છે. કાં તો તેને તરત જ રીપેર કરાવો અથવા ઘરમાંથી હટાવી દો.
3. પલંગ પર ગંદા કપડાં અને અસ્વચ્છતા
ઘણા લોકો પલંગ પર જ ગંદા કપડાંનો ઢગલો રાખે છે અથવા અસ્વચ્છ ચાદર બિછાવી રાખે છે. વાસ્તુ મુજબ, જે ઘરમાં સ્વચ્છતાની અવગણના થાય છે ત્યાં હકારાત્મક ઉર્જાનો અભાવ જોવા મળે છે. પલંગ પરની ગંદકી માનસિક તણાવ વધારે છે અને આડકતરી રીતે ધન હાનિનું કારણ બને છે.
4. ઘરના મુખ્ય દ્વાર પર પગરખાંનો ઢગલો
ઘરનો મુખ્ય દરવાજો એ ઉર્જા અને સમૃદ્ધિનો પ્રવેશદ્વાર છે. જો પ્રવેશદ્વાર પર જ જૂના પગરખાં, ચપ્પલ કે કચરો વેરવિખેર પડ્યો હશે, તો દેવી લક્ષ્મીના આગમનમાં બાધા આવશે. ઘરના ઉંબરાને હંમેશા સાફ રાખવો જોઈએ જેથી સુખ-શાંતિનો વાસ રહે.
5. કરમાઈ ગયેલા કે સુકાઈ ગયેલા છોડ
ઘરમાં રાખેલા છોડ વાતાવરણને શુદ્ધ કરે છે, પરંતુ જો આ છોડ સુકાઈ ગયા હોય કે કરમાઈ ગયા હોય, તો તે નકારાત્મકતા ફેલાવે છે. સુકાઈ ગયેલા છોડ આર્થિક તણાવ અને નિરાશાનું પ્રતીક છે. આવા છોડને તરત જ હટાવીને લીલાછમ છોડ લગાવવા જોઈએ.
6. મોડી રાત સુધી જાગવાની આદત
વાસ્તુ અને સ્વાસ્થ્ય બંને દૃષ્ટિએ મોડી રાત સુધી જાગવું નુકસાનકારક છે. જે લોકો બિનજરૂરી રીતે મોડી રાત સુધી જાગે છે, તેમનો ચંદ્ર અને શનિ નબળો પડે છે. આ આદત માનસિક નબળાઈ લાવે છે, જેના કારણે વ્યક્તિ ધન સંબંધી નિર્ણયો લેવામાં ભૂલ કરી બેસે છે.
7. રાત્રે રસોડામાં ગંદા વાસણો છોડવા
રસોડું એ ઘરનું સૌથી પવિત્ર સ્થાન છે જ્યાં અન્નપૂર્ણાનો વાસ હોય છે. રાત્રે રસોડામાં ગંદા વાસણોનો ઢગલો છોડી દેવો એ સૌથી મોટો વાસ્તુ દોષ છે. આનાથી ઘરમાં નકારાત્મકતા વધે છે અને આર્થિક તંગીનો સામનો કરવો પડી શકે છે. હંમેશા રાત્રે રસોડું સાફ કરીને જ સૂવું જોઈએ.
