મેથીની ઝૂડી સાફ કરવામાં કંટાળો આવે છે? : રસોડાની આ વસ્તુથી મિનિટોમાં થઈ જશે સાફ, આજે જ અજમાવો આ સરળ ટિપ્સ

શિયાળાની ઋતુ આવતાની સાથે જ બજારમાં તાજી, લીલીછમ મેથીની ઝૂડીઓની ભરમાર જોવા મળે છે. મેથીના ગરમાગરમ થેપલા, ક્રિસ્પી ગોટા કે સ્વાદિષ્ટ શાક ખાવાની મજા જ કંઈક અલગ હોય છે. ઘરમાં મેથીની સુગંધ ફેલાય ત્યારે ઠંડીના દિવસો વધુ આનંદદાયક લાગે છે. પરંતુ મેથીની વાનગી બનાવવાનો વિચાર આવે ત્યારે સૌથી મોટી સમસ્યા થાય છે તેની સફાઈની!મેથીના એક-એક પાનને ડાળીમાંથી અલગ કરવા, તેમાં ફસાયેલી માટી-રેતી કાઢવી અને વારંવાર ધોવી, આ આખી પ્રક્રિયા એટલી કંટાળાજનક અને સમય માંગી લે તેવી હોય છે કે, ઘણી વખત મન જ બદલાઈ જાય છે. બજારમાંથી મેથી લાવીને ફ્રિજમાં મૂકી દઈએ અને વિચારીએ કે 'કાલે સાફ કરીશું', પરંતુ તે કાલ ક્યારેય નથી આવતું અને છેવટે મેથી બગડી જાય છે.

આ સમસ્યા ખાસ કરીને વર્કિંગ મહિલાઓ અને સવારે ઝડપી રસોઈ બનાવવા વાળા લોકો માટે વધુ મોટી હોય છે.પરંતુ હવે ચિંતા કરવાની જરૂર નથી! સોશિયલ મીડિયા પર એક જબરદસ્ત કિચન ટ્રીક વાયરલ થઈ રહી છે, જેનાથી તમે મિનિટોમાં જ મેથીના પાન અલગ કરી શકો છો અને તેને એકદમ સાફ કરી શકો છો. આ ટ્રીકમાં રસોડામાં હંમેશા રહેતી એક સામાન્ય વસ્તુનો ઉપયોગ થાય છે, જેનાથી તમારું કામ રમતા-રમતા થઈ જશે. આજે અમે તમને આ સરળ અને સ્માર્ટ ટ્રીક વિશે વિગતવાર જણાવીશું.

મેથી સાફ કરવાની સૌથી મોટી સમસ્યા શું છે?

બજારમાંથી આવતી મેથીની ઝૂડીઓ માટી, ધૂળ અને રેતીથી ભરેલી હોય છે. એક-એક પાનને હાથથી તોડવું અને ડાળીઓ અલગ કરવી એ ખૂબ જ સમય માંગી લે તેવું કામ છે. આ પ્રક્રિયામાં કલાકો નીકળી જાય અને રસોડું પણ ગંદું થઈ જાય. પરિણામે ઘણા લોકો મેથીની વાનગી બનાવવાનું ટાળી દે છે અથવા તો તેને બગાડવા દે છે.

રસોડાની આ વસ્તુથી મિનિટોમાં પાન અલગ થશે

આ વાયરલ ટ્રીકમાં વપરાતી વસ્તુ છે છીણી (ગ્રેટર), જે દરેક ઘરના રસોડામાં જોવા મળે છે. મેથીની ડાળીને છીણીના મોટા કાણાંમાંથી હળવેથી ખેંચી લો. બસ, આટલું કરતાં જ ડાળીઓ અને લીલા પાન એકદમ સરળતાથી અલગ થઈ જશે. આ રીતથી તમે ગમે તેટલી મેથીને ફટાફટ સાફ કરી શકશો, ન વધુ મહેનત, ન વધુ સમય!જો તમારી છીણીમાં કાણાં નાના હોય અથવા છીણી ન હોય, તો તળવા માટે વપરાતા કાણાંવાળા ઝારા (સ્ટ્રેનર અથવા છલણી)નો પણ ઉપયોગ કરી શકો છો. ઝારાના કાણાંમાં મેથીની દાંડી નાખીને નીચેથી હળવેથી ખેંચો – પાન તરત જ અલગ થઈ જશે. આ ટ્રીક ખાસ કરીને વર્કિંગ લોકો માટે આદર્શ છે, જેમની પાસે સવારે રસોઈ માટે ઓછો સમય હોય છે.

મેથીના પાનને કેવી રીતે સારી રીતે ધોવા?

પાન અલગ થયા પછી તેમને સાફ કરવા માટે પણ આ જ વસ્તુઓનો ઉપયોગ કરો. મેથીના પાનને એક મોટા વાસણમાં પાણી ભરીને નાખો અને હળવેથી હલાવો. પછી છીણી અથવા ઝારામાંથી પાણી નીતારી લો. આમ કરવાથી ગંદકી અને માટી તળિયે બેસી જશે અને સ્વચ્છ પાણી ઉપર આવશે. આ પ્રક્રિયા 1થી 2 વાર કરો, તમારી મેથી એકદમ સાફ અને તાજી થઈ જશે. આમાં હાથથી નીચોવવાની કે કિચન ગંદું કરવાની કોઈ ઝંઝટ નથી. આ સરળ ટ્રીક અજમાવીને તમે શિયાળામાં મેથીની વાનગીઓનો આનંદ વધુ સરળતાથી લઈ શકશો.