જ્યોતિર્મઠના શંકરાચાર્ય સ્વામી અવિમુક્તેશ્વરાનંદ સરસ્વતીનું સ્વાસ્થ્ય બગડ્યું હોવાના સમાચાર સામે આવ્યા છે. પ્રયાગરાજમાં ચાલી રહેલા માઘ મેળા દરમિયાન સતત ઠંડા વાતાવરણમાં ખુલ્લા આકાશ નીચે બેસી રહેવાને કારણે તેમની સેહત પર વિપરીત અસર પડી હોવાનું જણાવાઈ રહ્યું છે.
મળતી માહિતી મુજબ તેમને તેજ તાવ અને અત્યંત થાકની ફરિયાદ છે. ચાલો જાણીએ સ્વામી અવિમુક્તેશ્વરાનંદ અત્યારે કઈ તકલીફનો સામનો કરી રહ્યા છે.
ખુલ્લામાં ધરણા પર બેસવાથી બગડી તબિયત
મૌની અમાસના દિવસે થયેલા વિવાદ બાદ સ્વામી અવિમુક્તેશ્વરાનંદ છેલ્લા 06 દિવસથી પોતાના શિબિરની બહાર ધરણા પર બેઠા છે. કડકડતી ઠંડીમાં લાંબા સમય સુધી ખુલ્લામાં રહેવાને કારણે તેમને શરદી અને તાવ આવવાની શક્યતા વ્યક્ત કરવામાં આવી રહી છે. તેમના શિષ્યોના જણાવ્યા અનુસાર હાલત લથડતા વૈદ્યો અને તબીબોની સલાહ લેવામાં આવી છે. શિષ્યોએ વધુમાં જણાવ્યું કે સ્વામીજી એલોપેથિક દવાઓ લેતા નથી, તેથી તેમની આયુર્વેદિક પદ્ધતિથી સારવાર કરવામાં આવી રહી છે. દવાઓ આપ્યા બાદ હાલમાં તેઓ આરામ કરી રહ્યા છે અને સ્વાસ્થ્યના કારણોસર મુલાકાતીઓ પર નિયંત્રણ મૂકવામાં આવ્યું છે. તેઓ પોતાની શિબિરના ગેટ પર ઉભેલી ફોર્સ વેનમાં વિશ્રામ કરી રહ્યા છે.
હજુ સુધી મેડિકલ બુલેટિન જાહેર કરવામાં આવ્યું નથી
સ્વામી અવિમુક્તેશ્વરાનંદની તબિયત ખરાબ હોવાની પુષ્ટિ થઈ છે પરંતુ હજુ સુધી કોઈ સત્તાવાર મેડિકલ બુલેટિન કે વહીવટી નિવેદન બહાર પાડવામાં આવ્યું નથી. આ બાબતને લઈને તેમના અનુયાયીઓ અને સમર્થકોમાં ચિંતા અને રોષ જોવા મળી રહ્યો છે. લોકોની માંગ છે કે ડોકટરોની ટીમ દ્વારા વહેલી તકે તેમની તપાસ કરવામાં આવે જેથી સ્થિતિ સ્પષ્ટ થઈ શકે.
મૌની અમાસને લઈને શું છે સમગ્ર વિવાદ?
વાસ્તવમાં મૌની અમાસના દિવસે સંગમ સ્નાન માટે જતી વખતે મેળા વહીવટીતંત્ર દ્વારા સ્વામી અવિમુક્તેશ્વરાનંદની પાલખી રોકવામાં આવી હતી જેનાથી આ વિવાદ શરૂ થયો હતો. શંકરાચાર્ય અને તેમના શિષ્યોએ વહીવટીતંત્ર પર ધક્કામુક્કી અને અભદ્ર વર્તનનો આરોપ લગાવ્યો હતો. ત્યારથી તેઓ પોતાની શિબિરની બહાર પાલખી પર બેસી ગયા છે અને વહીવટીતંત્ર જાહેરમાં માફી માંગે તેમજ સન્માનપૂર્વક સ્નાન કરાવવામાં આવે તેવી માંગ પર અડગ છે. આ સમગ્ર મામલે રાજકીય નિવેદનબાજી પણ તેજ થઈ છે, જ્યારે સંત સમાજ દ્વારા શાંતિ અને સંયમ જાળવવાની અપીલ કરવામાં આવી છે.
