Shahana Goswami : બોલિવૂડની ગ્લેમરસ અને પ્રતિભાશાળી અભિનેત્રી શહાના ગોસ્વામી પોતાની શાનદાર એક્ટિંગ સિવાય પોતાના બેબાક અંદાજ માટે પણ જાણીતી છે. તાજેતરમાં જ તેણે એક લોકપ્રિય ઇન્ટરવ્યુમાં પોતાની પર્સનલ લાઈફ, પ્રેમ અને સંબંધોને લઈને કેટલાક એવા ચોંકાવનારા ખુલાસા કર્યા છે, જેણે સોશિયલ મીડિયા પર ધૂમ મચાવી દીધી છે. શહાનાએ સુપરમોડેલ અને અભિનેતા મિલિંદ સોમન સાથેના પોતાના વર્ષો જૂના સંબંધો અને આજે પોતાની રિલેશનશિપ લાઈફ વિશે ખૂબ જ ખુલીને અને ઈમાનદારીથી વાત કરી છે, જે સામાન્ય લોકો માટે તદ્દન અલગ છે.
શહાના ગોસ્વામીની ફિલ્મી સફર
બોલિવૂડ દિવા શહાના ગોસ્વામીને ફિલ્મ ઇન્ડસ્ટ્રીમાં કોઈ પરિચયની જરૂર નથી, કારણ કે તેણે પોતાની દમદાર એક્ટિંગના કારણે સિનેમા જગતમાં એક મજબૂત ઓળખ બનાવી છે. તેણે "રોક ઓન", "ફિરાક", "હિરોઈન", "મિડનાઈટ ચિલ્ડ્રન" જેવી સુપરહિટ ફિલ્મોથી લઈને તાજેતરમાં આવેલી "ઝ્વિગાટો" અને આંતરરાષ્ટ્રીય સ્તરે ખૂબ જ વખણાયેલી ફિલ્મ "સંતોષ" માં શાનદાર અભિનય કર્યો છે. શહાના હંમેશા પડકારજનક અને લીગથી હટીને પાત્રો પસંદ કરવા માટે જાણીતી છે, જેના કારણે વિવેચકો પણ તેના ફેન છે.
મિલિંદ સોમન સાથે પ્રેમ અને ઉંમરનો તફાવત
પ્રખ્યાત હોસ્ટ સિદ્ધાર્થ કન્નન સાથેના એક ખાસ ઇન્ટરવ્યુમાં શહાનાએ ખુલાસો કર્યો હતો કે જ્યારે તે માત્ર 22 વર્ષની યુવતી હતી, ત્યારે તેને પોતાનાથી 21 વર્ષ મોટા સુપરમોડેલ મિલિંદ સોમન સાથે પ્રેમ થઈ ગયો હતો. સામાન્ય રીતે સમાજમાં આટલો મોટો ઉંમરનો તફાવત ચર્ચા અને આલોચનાનો વિષય બને છે, પરંતુ શહાનાનું કહેવું છે કે તે સમયે તેમને આ ઉંમરનો તફાવત ક્યારેય નડ્યો ન હતો. શહાના માનસિક રીતે પોતાની ઉંમર કરતાં વધુ સમજદાર હતી, જેના કારણે બંને વચ્ચે ખૂબ જ સારો તાલમેલ જોવા મળ્યો હતો અને આ સંબંધ લગભગ 4 થી 5 વર્ષ સુધી ખૂબ જ સુંદર રીતે ચાલ્યો હતો.
આ રીતે શરૂ થઈ હતી અનોખી લવ સ્ટોરી
પોતાની લવ સ્ટોરીની શરૂઆત વિશે વાત કરતા શહાનાએ એક રસપ્રદ કિસ્સો શેર કર્યો હતો કે જ્યારે તે 16 વર્ષની સ્કૂલની વિદ્યાર્થિની હતી, ત્યારે તેણે મિલિંદની એક ફિલ્મ જોઈ હતી. શરૂઆતમાં તેને લાગ્યું કે કોઈ મોડેલની ફિલ્મ હોવાથી તે કદાચ સારી નહીં હોય, પરંતુ ફિલ્મ જોયા પછી તે મિલિંદની મોટી ફેન બની ગઈ હતી. ત્યારબાદ તેણે ઇન્ટરનેટ પર મિલિંદનું સરનામું શોધવાનો પ્રયત્ન કર્યો પણ તેને મિલિંદનો લેન્ડલાઇન નંબર મળી ગયો. તે જ સમયે તેના પિતાએ તેને તેનો પહેલો મોબાઈલ ફોન અપાવ્યો હતો, જેમાંથી તેણે મિલિંદને જન્મદિવસનો મેસેજ મોકલ્યો હતો. આ રીતે શરૂ થયેલી વાતચીત આગામી 6 વર્ષ સુધી માત્ર મેસેજ પર ચાલતી રહી અને જ્યારે શહાના ભણવા માટે મુંબઈ આવી ત્યારે બંને સિંગલ હોવાથી મળ્યા અને માત્ર 4 દિવસમાં જ ડેટિંગ શરૂ કરી દીધું હતું.
બ્રેકઅપનું મુખ્ય કારણ અને બિલાડીઓ પ્રત્યે પ્રેમ
આ સંબંધ દરમિયાન શહાનાને મિલિંદના કારણે બિલાડીઓ પ્રત્યે ખૂબ જ પ્રેમ થઈ ગયો હતો, કારણ કે મિલિંદ પોતે બિલાડીઓનો ખૂબ મોટો શોખીન હતો. જો કે, આટલા લાંબા સમય સુધી સાથે રહ્યા બાદ આખરે તેમનું બ્રેકઅપ થઈ ગયું હતું. આ વિશે વાત કરતા શહાનાએ જણાવ્યું કે સમય જતાં તેમને સમજાયું કે તેઓ બંને વ્યક્તિગત રીતે એકબીજાથી ખૂબ જ અલગ હતા. તેણે સંબંધો પર એક ખૂબ જ સુંદર વાત કહી કે મારા મતે સાચો પ્રેમ એ છે જે સામેવાળી વ્યક્તિને પૂરી મુક્ત અને સ્વતંત્રતા આપે, તેને ક્યારેય પોતાના વિચારોના બંધનોમાં જકડીને રાખવો જોઈએ નહીં. આ જ પરસ્પર સમજણને કારણે તેઓ કોઈ પણ કડવાશ વગર અલગ થઈ ગયા હતા.
ઓપન રિલેશનશિપ પર શહાનાના આધુનિક વિચારો
ઇન્ટરવ્યુના સૌથી ચોંકાવનારા ભાગમાં શહાનાએ પોતાની વર્તમાન લાઈફ વિશે વાત કરતાં કહ્યું કે, આજે તેના જીવનમાં એક નહીં પરંતુ ઘણા પાર્ટનર છે. જોકે, તેણે સ્પષ્ટ કર્યું કે તેનો કોઈ પણ સંબંધ કેઝ્યુઅલ કે ટાઈમપાસ નથી હોતો અને તે દરેક સંબંધને ખૂબ ગંભીરતાથી નિભાવે છે. તેના માટે ઓપન રિલેશનશિપ એ એક ગાઢ મિત્રતા સમાન છે. આ એક એવો મુક્ત પ્રવાહ છે જે ક્યારેક માત્ર સામાન્ય મિત્રતા હોઈ શકે છે, ક્યારેક તે શારીરિક સંબંધમાં બદલાઈ શકે છે, તો ક્યારેક તે માત્ર એક મજબૂત ભાવનાત્મક બંધન બનીને રહી શકે છે. તે સંબંધોને પરંપરાગત વ્યાખ્યામાં બાંધવા માંગતી નથી.
