Ramcharan Personal Bodyguard: સામાન્ય રીતે ફિલ્મી સિતારાઓ પોતાની સુરક્ષા માટે હથિયારધારી બોડીગાર્ડ્સ કે સુરક્ષા એજન્સીઓ પર નિર્ભર રહેતા હોય છે, પરંતુ રામ ચરણે પોતાની સુરક્ષા માટે એક અલગ અને અનોખો રસ્તો અપનાવ્યો છે. તાજેતરમાં રામ ચરણ સાથે જોવા મળેલા તેમના નવા બોડીગાર્ડે ચાહકોનું ધ્યાન ખેંચ્યું છે. આ બોડીગાર્ડની શારીરિક રચના અને સ્ટાઈલ હોલીવુડની એક્શન મૂવીઝના પાત્રો જેવી લાગે છે, જેણે હવે દરેકના મનમાં કુતૂહલ જગાવ્યું છે કે આખરે આ વ્યક્તિ છે કોણ?
સાઉથના દિગ્ગજ અભિનેતા રામ ચરણ પોતાની ફિલ્મો અને શાનદાર અભિનય માટે હંમેશા ચર્ચામાં રહે છે, પરંતુ હાલમાં તેઓ પોતાની સુરક્ષા માટે રાખેલા એક ખાસ બોડીગાર્ડને લઈને સોશિયલ મીડિયા પર છવાયેલા છે. રામ ચરણના સુરક્ષાકર્મી તરીકે દેખાતો આ શખ્સ કોઈ સામાન્ય બોડીગાર્ડ નથી, પરંતુ આફ્રિકાનો પ્રોફેશનલ એમએમએ (MMA) ફાઈટર છે, જેની તાકાત અને ફિટનેસ જોઈને સૌ કોઈ આશ્ચર્યચકિત થઈ રહ્યા છે.
કોણ છે આ રહસ્યમયી બોડીગાર્ડ કેવિન કુન્ટો?
રામ ચરણના અંગરક્ષક તરીકે જોવા મળતા આ શખ્સનું નામ કેવિન કુન્ટો (Kevin Kunto) છે. તેમનું અસલી નામ અબ્દુ સોવે છે અને તેઓ મૂળ ગામ્બિયા (આફ્રિકા) ના વતની છે. કેવિન કોઈ સામાન્ય સુરક્ષાકર્મી નથી, પરંતુ એક પ્રોફેશનલ મિક્સ્ડ માર્શલ આર્ટ્સ (MMA) ફાઈટર છે. એમએમએ એ એક એવી ફાઈટિંગ સ્ટાઈલ છે જેમાં બોક્સિંગ, કુસ્તી અને કરાટે જેવી કળાનો સમન્વય હોય છે. કેવિનની સૌથી મોટી ખાસિયત તેમની ઝડપ છે; તેઓ માત્ર 30 સેકન્ડમાં 15 કિક મારવાની અદભૂત ક્ષમતા ધરાવે છે, જે કોઈપણ હુમલાખોરને ક્ષણભરમાં પછાડવા માટે પૂરતી છે.
ચેમ્પિયન ફાઈટર અને ફિટનેસનો બાદશાહ
કેવિન કુન્ટો માત્ર એક બોડીગાર્ડ જ નથી, પરંતુ તેઓ ઈટાલીમાં 'કોલોસિયમ ચેમ્પિયન બેલ્ટ'ના વિજેતા રહી ચૂક્યા છે. તેમણે 2021માં ઈટાલીની નેશનલ એમએમએ ટીમને રિપ્રેઝન્ટ કર્યું હતું. તેમની ફિટનેસ અને મજબૂત બાંધાને કારણે તેઓ સોશિયલ મીડિયા પર પણ ખૂબ લોકપ્રિય છે. અગાઉ તેઓ અનેક આંતરરાષ્ટ્રીય સેલિબ્રિટીઝ અને વીઆઈપીઝ માટે 'ક્લોઝ પ્રોટેક્શન' સર્વિસ આપી ચૂક્યા છે. જોકે, હજુ સુધી તે સત્તાવાર રીતે સ્પષ્ટ નથી થયું કે કેવિન રામ ચરણના કાયમી બોડીગાર્ડ છે કે માત્ર કોઈ ચોક્કસ ફિલ્મના પ્રમોશન દરમિયાન તેમને રાખવામાં આવ્યા છે.
લાખોની સેલેરી અને હથિયાર નહીં પણ હુનર પર વિશ્વાસ
સૂત્રોના જણાવ્યા અનુસાર, કેવિન કુન્ટોનું માસિક વેતન 3 થી 5 લાખ રૂપિયાની વચ્ચે હોવાનું મનાય છે. એક સામાન્ય બોડીગાર્ડ કરતા આ રકમ ઘણી વધારે છે, પરંતુ એક આંતરરાષ્ટ્રીય સ્તરના એમએમએ ફાઈટરની સ્કિલ્સ જોતા આ રોકાણ યોગ્ય જણાય છે. રામ ચરણનો આ નિર્ણય એ દર્શાવે છે કે, તેઓ હથિયારો કરતા પોતાની સુરક્ષામાં 'ફિઝિકલ સ્કિલ' અને 'ટ્રેનિંગ'ને વધુ મહત્વ આપે છે. આધુનિક સમયમાં વિશ્વના મોટા સ્ટાર્સ હવે હથિયારધારી ગાર્ડ્સને બદલે માર્શલ આર્ટ્સના જાણકારોને પોતાની સુરક્ષા સોંપવાનું પસંદ કરી રહ્યા છે.
