માનવ જીવનમાં નામનું મહત્વ માત્ર દસ્તાવેજો પૂરતું મર્યાદિત નથી, પરંતુ તે આપણી ઓળખનો મુખ્ય આધાર છે. અંકશાસ્ત્ર (Numerology) મુજબ, દરેક નામ ચોક્કસ વાઈબ્રેશન્સ ધરાવે છે જે વ્યક્તિના જીવન પર ઊંડી અસર કરે છે. ઘણીવાર પ્રતિભા હોવા છતાં વ્યક્તિને સફળતા મળતી નથી, જેની પાછળ નામમાં રહેલા અંકોની અસંગતતા જવાબદાર હોઈ શકે છે. અંક જ્યોતિષ માને છે કે જો નામ મૂલાંક અને ભાગ્યાંક સાથે મેળ ખાતું ન હોય તો જીવનમાં મુશ્કેલીઓનો સામનો કરવો પડે છે.
સેલેબ્રિટીઝમાં નામ બદલવાનો ક્રેઝ અને સફળતા
વર્તમાન સમયમાં નામમાં ફેરફાર કરવો એ માત્ર ફેશન નથી પણ એક જરૂરિયાત બની ગઈ છે. બોલિવૂડમાં અનેક દિગ્ગજોએ પોતાના નામની ઉર્જા બદલીને સફળતાના શિખરો સર કર્યા છે. અમિતાભ બચ્ચન, અજય દેવગન, આયુષ્માન ખુરાના અને રાજકુમાર રાવ જેવા કલાકારોએ પોતાના નામમાં અંગ્રેજી અક્ષરોમાં ફેરફાર કરીને નસીબને સાથ આપ્યો છે. દાયકાઓ પહેલા મોહમ્મદ યુસુફે 'દિલીપ કુમાર' નામ ધારણ કરીને ફિલ્મ જગતમાં જે ઈતિહાસ રચ્યો તે નામની ઉર્જાનું શ્રેષ્ઠ ઉદાહરણ છે.
ન્યુમરોલોજી મુજબ કેવી રીતે રાખવું નામ?
જ્યારે કોઈ નવજાત બાળકનું નામ રાખવાનું હોય અથવા પોતાનું નામ સુધારવું હોય, ત્યારે મૂલાંક અને ભાગ્યાંકની ગણતરી અનિવાર્ય છે. નામ હંમેશા એવા અંક પર આવવું જોઈએ જે વ્યક્તિના ભાગ્યાંક સાથે અનુકૂળ હોય. નામના સ્પેલિંગમાં એક અક્ષર ઉમેરવાથી કે ઘટાડવાથી નકારાત્મક વાઈબ્રેશન્સ હકારાત્મક ઉર્જામાં પરિવર્તિત થઈ શકે છે. જે વ્યક્તિનું નામ અંકો મુજબ સેટ હોય છે, તેમને જીવનમાં સંઘર્ષ ઓછો કરવો પડે છે અને પૈસા, પાવર તેમજ પ્રસિદ્ધિ સહજતાથી પ્રાપ્ત થાય છે.
ઉદાહરણ દ્વારા સમજો અંકોની માયાજળ
અંકશાસ્ત્રની દ્રષ્ટિએ 'કશ્મીર' (Kashmir) શબ્દનો સરવાળો 18 અંક થાય છે, જે જ્યોતિષીય રીતે સંઘર્ષમય માનવામાં આવે છે. જો તેને 'કાશમીર' (Kaashmir) તરીકે લખવામાં આવે તો તેનો અંક 19 થાય છે, જે અત્યંત શુભ ગણાય છે. ફિલ્મી ગીતોમાં પણ 'કાશમીર કી કલી' શબ્દનો પ્રયોગ તેની સફળતાનું કારણ માનવામાં આવે છે. તેવી જ રીતે 'જમ્મુ' શબ્દ 16 અંક પર આવે છે જે મધ્યમ શ્રેણીનો અંક છે. આમ, અક્ષરોની યોગ્ય ગોઠવણી ભાગ્યના દ્વાર ખોલી શકે છે.
