Meta AI Instagram Feature: સોશિયલ મીડિયા અને આર્ટિફિશિયલ ઈન્ટેલિજન્સ (AI) ક્ષેત્રમાં સતત નવા પ્રયોગો કરી રહેલી Metaએ પોતાના નવા AI ઈમેજ જનરેશન મોડેલ Muse Image સાથે જોડાયેલી એક મહત્વપૂર્ણ સુવિધા લોન્ચ કર્યાના થોડા જ દિવસોમાં પાછી ખેંચી લીધી છે. કંપનીએ શરૂઆતમાં એવી સુવિધા રજૂ કરી હતી, જેમાં યુઝર્સ જાહેર (Public) Instagram એકાઉન્ટને @mention કરીને તેને રેફરન્સ તરીકે ઉપયોગમાં લઈને AI ઈમેજ બનાવી શકતા હતા. જોકે, આ ફીચરને લઈને સોશિયલ મીડિયા પર ગોપનીયતા અને સંમતિ અંગે અનેક પ્રશ્નો ઉઠ્યા બાદ Metaએ હવે આ સુવિધા બંધ કરવાનો નિર્ણય લીધો છે.
કંપનીએ શુક્રવારે સત્તાવાર નિવેદનમાં જણાવ્યું કે, આ ફીચરનો હેતુ લોકોને વધુ સર્જનાત્મક સાધન (Creative Tool) ઉપલબ્ધ કરાવવાનો હતો અને જાહેર Instagram કન્ટેન્ટનો ઉપયોગ કેવી રીતે થઈ શકે તેના પર નિયંત્રણ આપવાનો પ્રયાસ કરવામાં આવ્યો હતો. પરંતુ યુઝર્સ તરફથી મળેલા પ્રતિસાદ બાદ Metaએ સ્વીકાર્યું કે, આ ફીચર લોકોની અપેક્ષા મુજબનું સાબિત થયું નથી. તેથી હવે Instagram એકાઉન્ટ રેફરન્સ ફીચર ઉપલબ્ધ રહેશે નહીં.
શું હતું Instagram Account Reference ફીચર?
Metaએ થોડા દિવસો પહેલા પોતાના નવા AI મોડેલ Muse Imageની રજૂઆત સાથે આ સુવિધાની જાહેરાત કરી હતી. આ ફીચર દ્વારા યુઝર્સ કોઈપણ જાહેર Instagram એકાઉન્ટને @mention કરીને તેની સ્ટાઈલ, ફોટો અથવા પ્રોફાઇલને રેફરન્સ તરીકે ઉપયોગમાં લઈ AI દ્વારા નવી ઈમેજ તૈયાર કરી શકતા. કંપનીનું કહેવું હતું કે,આ ફીચર સર્જનાત્મકતા વધારવા માટે બનાવવામાં આવ્યું હતું. જોકે, ઘણા યુઝર્સે સવાલ ઉઠાવ્યો હતો કે જાહેર એકાઉન્ટ હોવા છતાં કોઈની તસવીરો અથવા ઓળખને AI માટે રેફરન્સ તરીકે ઉપયોગમાં લેવું ગોપનીયતા અને ડિજિટલ અધિકારોના દૃષ્ટિકોણથી યોગ્ય છે કે નહીં.
Metaએ કેમ બદલ્યો નિર્ણય?
Metaએ પોતાના નિવેદનમાં જણાવ્યું કે, યુઝર્સ પાસેથી મળેલા પ્રતિસાદને ગંભીરતાથી લેવામાં આવ્યો છે. કંપનીએ સ્વીકાર્યું કે આ ફીચર લોકોની અપેક્ષા મુજબનું નહોતું અને તેથી તેને હટાવવાનો નિર્ણય લેવામાં આવ્યો છે.
આ નિર્ણય દર્શાવે છે કે, AI સાથે જોડાયેલી નવી ટેક્નોલોજી રજૂ કરતી વખતે કંપનીઓ હવે માત્ર ટેક્નિકલ ક્ષમતાઓ જ નહીં પરંતુ યુઝર્સની ગોપનીયતા, સંમતિ અને વિશ્વાસને પણ મહત્વ આપી રહી છે.
આ પણ વાંચો: હવે ઓફિસના મોટા ભાગના કામ કરશે ChatGPT! : OpenAIએ લોન્ચ કર્યું નવું AI ટૂલ, જાણો કેવી રીતે કરશે કામ
Muse Image શું છે?
Muse Image Meta Superintelligence Labs દ્વારા વિકસાવવામાં આવેલ Metaનું પ્રથમ અદ્યતન AI ઈમેજ જનરેશન મોડેલ છે. કંપનીના જણાવ્યા અનુસાર, આ મોડેલ જટિલ (Complex) પ્રોમ્પ્ટને સમજવાની ક્ષમતા ધરાવે છે અને એકથી વધુ તસવીરોને જોડીને નવી AI ઈમેજ તૈયાર કરી શકે છે. આ ઉપરાંત, Muse Imageમાં પ્રીસેટ પ્રોમ્પ્ટ્સની સુવિધા આપવામાં આવી છે જેથી યુઝર્સને નવી ક્રિએટિવ આઈડિયા મળી શકે. સાથે જ સ્કેચ, ડૂડલ અથવા એનોટેશન દ્વારા ચેટ દરમિયાન જ ઈમેજમાં ફેરફાર કરવાની સુવિધા પણ ઉપલબ્ધ છે.
Metaના અન્ય પ્લેટફોર્મ પર ચાલુ રહેશે Muse Image
Instagram Account Reference ફીચર હટાવવામાં આવ્યું હોવા છતાં Muse Imageનું વૈશ્વિક રોલઆઉટ યથાવત રહેશે. Metaએ અગાઉ જણાવ્યું હતું કે આ મોડેલ Instagram અને WhatsApp પર સર્જનાત્મક AI અનુભવને શક્તિ આપશે અને ટૂંક સમયમાં Facebook, Messenger તેમજ Meta Advantage+ Creative દ્વારા જાહેરાતદાતાઓ માટે પણ ઉપલબ્ધ થશે. એટલે કે Instagram એકાઉન્ટને રેફરન્સ તરીકે ઉપયોગ કરવાની સુવિધા બંધ થઈ છે, પરંતુ AI ઈમેજ જનરેશનની અન્ય તમામ સુવિધાઓ અગાઉની જેમ ચાલુ રહેશે.
AI અને ગોપનીયતા વચ્ચે સંતુલન મોટો પડકાર
AI ટેક્નોલોજીના ઝડપી વિકાસ સાથે ગોપનીયતા અને કૉપીરાઇટ જેવા મુદ્દાઓ વધુ મહત્વના બન્યા છે. છેલ્લા કેટલાક મહિનાઓમાં અનેક AI કંપનીઓને ટ્રેનિંગ ડેટા, વ્યક્તિગત ઓળખ અને જાહેર કન્ટેન્ટના ઉપયોગને લઈને ટીકા સહન કરવી પડી છે. Metaનો આ નિર્ણય એ વાતનો સંકેત આપે છે કે, AI ક્ષેત્રમાં નવી સુવિધાઓ વિકસાવતી કંપનીઓ માટે માત્ર નવીનતા જ નહીં, પરંતુ યુઝર્સનો વિશ્વાસ અને ડેટા પ્રાઇવસી પણ એટલી જ મહત્વપૂર્ણ બની ગઈ છે.
