ઘરે બનાવો રેસ્ટોરન્ટ જેવી સુપરહિટ મેથી કઢી : એક વાર ખાશો તો આંગળીઓ ચાટી જશો! જાણી લો આ સરળ રેસીપી

Methi Kadhi Recipe: મેથીની કઢી – શિયાળાની સ્વાદિષ્ટ, ઝડપી અને આંગળીઓ ચટાવી દે તેવી રેસિપી! શિયાળાની ઠંડીમાં તાજી લીલી મેથીનો સ્વાદ જ ન્યારો હોય છે! મેથીના પરોઠા, શાક કે ભજિયા તો બધા બનાવે છે, પણ આ વખતે ટ્રાય કરો આ અદભુત મેથીની કઢી – એક વાર ખાશો એટલે વારંવાર બનાવવાનું મન થશે! પકોડા વગરની, સરળ અને સુપર ટેસ્ટી કઢી, જે રોટલી-ભાત કે પરોઠા સાથે પરફેક્ટ લાગે છે.

જરૂરી સામગ્રી (4 વ્યક્તિ માટે)

તાજી લીલી મેથી – 2 કપ (પાન પાડી, બારીક સમારેલી)

દહીં અથવા છાશ – 2-3 કપ

ચણાનો લોટ – 3-4 ચમચી

તેલ – 2 ચમચી (કઢી માટે) + 2 ચમચી (વઘાર માટે)

હળદર – 1 ચમચી

લાલ મરચું પાવડર – સ્વાદાનુસાર

ધાણા-જીરું પાવડર – 1-1 ચમચી

હિંગ – એક ચપટી

મીઠું – સ્વાદાનુસાર

પાણી – જરૂર પ્રમાણે

વઘાર માટે

સરસવ, જીરું, મેથી દાણા – 1/2 ચમચી દરેક

સૂકા લાલ મરચા – 2

લસણ – 8-10 કળી (બારીક સમારેલી)

લીલું મરચું – 1 (સમારેલું)

ડુંગળી – 1 મધ્યમ (લંબાઈમાં કાપેલી)

કસૂરી મેથી – 1 ચમચી

કોથમીર – સમારેલી (સજાવટ માટે)

બનાવવાની રીત

મેથી તૈયાર કરો

કઢાઈમાં 1 ચમચી તેલ ગરમ કરો. તેમાં સમારેલી લીલી મેથી નાખી 2-3 મિનિટ સાંતળો, જેથી તેની કડવાશ ઓછી થઈ જાય.

ખીરું તૈયાર કરો

એક બાઉલમાં દહીં અથવા છાશ ફેંટી લો. તેમાં ચણાનો લોટ, હળદર, લાલ મરચું, ધાણા પાવડર, મીઠું અને હિંગ નાખી સારી રીતે ફેંટી, એકદમ સરસ ખીરું બનાવો (ગઠ્ઠા ન રહે).

કઢી ચઢાવો

આ ખીરું મેથીમાં ધીમે ધીમે નાખો અને સતત હલાવતા રહો. 8-10 મિનિટ સુધી ઉકળવા દો. જ્યારે કઢી થોડી ઘટ્ટ થાય ત્યારે જરૂર પ્રમાણે પાણી નાખી ઇચ્છિત પાતળી કરો. ધીમા ગેસ પર 5-7 મિનિટ વધુ ઉકળવા દો – જેટલી વધુ ઉકળશે એટલો સ્વાદ વધશે!

ધમાકેદાર વઘાર

નાની કઢાઈમાં 2 ચમચી તેલ/ઘી ગરમ કરો. જીરું, સરસવ, મેથી દાણા, સૂકા લાલ મરચા ફૂટે. તરત જ સમારેલું લસણ, લીલું મરચું અને ડુંગળી નાખો, હળવું ગુલાબી થાય ત્યાં સુધી સાંતળો. અંતે કસૂરી મેથી, થોડી હળદર અને લાલ મરચું નાખી આ વઘાર કઢીમાં ઝડપથી રેડી દો. ઉપરથી તાજી કોથમીર છાંટો.

બસ! તમારી આંગળીઓ ચાટવા મજબૂર કરી દે તેવી ગરમાગરમ મેથીની કઢી તૈયાર છે! આજે જ બનાવો અને ઘરના બધાને ખુશ કરી દો!