મહાભારતનું યુદ્ધ સમાપ્ત થયાના અનેક વર્ષો પછી ભગવાન શ્રીકૃષ્ણે દ્વારકા પર રાજ કર્યું. પરંતુ, જ્યારે તેમનો પૃથ્વી પરનો સમય પૂર્ણ થયો, ત્યારે તેમણે દેહ ત્યાગ કર્યો અને સોનાની નગરી દ્વારકા સમુદ્રમાં સમાઈ ગઈ. આ ઘટના બાદ ભગવાનની પત્નીઓ અને દ્વારકાના ધનનું શું થયું, તે વિશે વિષ્ણુ પુરાણમાં એક અત્યંત રસપ્રદ કથા છે.
શ્રીકૃષ્ણના દેહ ત્યાગ બાદ પટરાણીઓનું શું થયું?
વિષ્ણુ પુરાણ અનુસાર, શ્રીકૃષ્ણે દેહ ત્યાગ કરતા પહેલા અર્જુનને સંદેશો મોકલ્યો હતો કે 7 દિવસમાં દ્વારકા સમુદ્રમાં ડૂબી જશે, તેથી તે સ્ત્રીઓ અને ધનને લઈને ત્યાંથી નીકળી જાય. શ્રીકૃષ્ણના ગયા બાદ તેમની 8 મુખ્ય પટરાણીઓએ ભગવાનના દેહને ખોળામાં લઈને અગ્નિ સમાધિ લીધી અને સતી થઈ ગઈ.
લૂંટારુઓએ કર્યો હુમલો, અર્જુન કેમ ન બચાવી શક્યા?
અર્જુન જ્યારે બાકીની સ્ત્રીઓ, બાળકો અને સંપત્તિ લઈને દ્વારકાથી નીકળ્યા, ત્યારે માર્ગમાં લૂંટારુઓએ હુમલો કર્યો. આશ્ચર્યની વાત એ હતી કે, જે અર્જુને મહાભારત જેવું યુદ્ધ જીત્યું હતું, તે લૂંટારુઓ સામે પોતાનું ગાંડીવ ધનુષ પણ ઉઠાવી શક્યા નહીં અને તેમની બધી મંત્ર શક્તિઓ નિષ્ફળ ગઈ. લૂંટારુઓ સ્ત્રીઓ અને ધનને લૂંટીને લઈ ગયા.
વ્યાસજીએ જણાવ્યું લૂંટારુઓ દ્વારા સ્ત્રી હરણનું રહસ્ય
હારેલા અને શોકમગ્ન અર્જુન જ્યારે મહર્ષિ વ્યાસ પાસે પહોંચ્યા, ત્યારે વ્યાસજીએ આ પાછળનું એક રહસ્ય જણાવ્યું. પૂર્વકાળમાં અષ્ટાવક્ર મુનિ જળમાં તપસ્યા કરી રહ્યા હતા, ત્યારે અપ્સરાઓએ તેમની સ્તુતિ કરી. મુનિએ પ્રસન્ન થઈ વરદાન માંગવા કહ્યું, ત્યારે અપ્સરાઓએ શ્રીકૃષ્ણને પતિ તરીકે મેળવવાની ઈચ્છા વ્યક્ત કરી.
પરંતુ, જ્યારે મુનિ જળની બહાર આવ્યા, ત્યારે તેમનું આઠ જગ્યાએથી વાંકું (કુરુપ) શરીર જોઈને અપ્સરાઓને હસવું આવ્યું. આથી ક્રોધિત થઈ અષ્ટાવક્ર મુનિએ શ્રાપ આપ્યો કે, "તમે શ્રીકૃષ્ણને પતિ તરીકે તો મેળવશો, પણ મારા શ્રાપને કારણે અંતે લૂંટારુઓના હાથે પકડાઈ જશો." આ શ્રાપને કારણે જ અર્જુન જેવો યોદ્ધા પણ તેમને બચાવી શક્યો નહીં.
