Garuda Puran: હિંદુ ધર્મમાં ગરુડ પુરાણને 18 પુરાણોમાંનું એક અત્યંત મહત્વનું શાસ્ત્ર માનવામાં આવે છે. સામાન્ય રીતે કોઈના મૃત્યુ બાદ આ પુરાણનું પઠન કરવાની પરંપરા છે, પરંતુ વાસ્તવમાં આ ગ્રંથ જીવન જીવવાની સાચી રીત અને કર્મોના ફળ વિશે ઊંડી સમજ આપે છે. ગરુડ પુરાણમાં ભગવાન વિષ્ણુએ તેમના વાહન ગરુડને માનવ જીવન, મૃત્યુ, નરક અને પુનર્જન્મ વિશેની રહસ્યમય વાતો જણાવી છે. આ શાસ્ત્ર અનુસાર, વ્યક્તિ જેવું કર્મ કરે છે, તે મુજબ જ તેને પરલોકમાં સજા અથવા પુરસ્કાર મળે છે અને તેના આધારે જ તેનો આગામી જન્મ નક્કી થાય છે. ઘણીવાર આપણા મનમાં પ્રશ્ન થાય છે કે મૃત્યુ પછી આત્મા ક્યાં જાય છે? શું ખરેખર પુનર્જન્મ થાય છે? ગરુડ પુરાણ આ તમામ પ્રશ્નોના ઉત્તર આપે છે. તે સ્પષ્ટ કરે છે કે શરીર નશ્વર છે પણ આત્મા અમર છે. મૃત્યુ પછી આત્મા પોતાના કર્મોની પોટલી લઈને યમરાજ પાસે જાય છે, જ્યાં તેના પાપ અને પુણ્યનો હિસાબ થાય છે. જો તમે પણ જાણવા માંગતા હોવ કે તમારા કર્મો તમને આગામી જન્મમાં ક્યાં લઈ જશે, તો વાંચો આ વિગતવાર અહેવાલ.
કર્મોનો હિસાબ અને આગામી જન્મના સંકેતો
ગરુડ પુરાણ મુજબ, વ્યક્તિના મૃત્યુ સમયે તેની માનસિક સ્થિતિ અને જીવનભરના કાર્યો તેના આગામી યોનિ (જન્મ) ને પ્રભાવિત કરે છે. જે લોકો જીવનભર પરોપકાર અને ભક્તિમાં લીન રહે છે, તેમને ઉત્તમ યોનિમાં જન્મ મળે છે. તેનાથી વિપરીત, અધર્મ અને પાપ કરનારાઓને પશુ કે પક્ષીની યોનિમાં જન્મ લેવો પડે છે.
સ્ત્રી કે પુરુષ: કોણ નક્કી કરે છે તમારો અવતાર?
આ શાસ્ત્રમાં એક અત્યંત રસપ્રદ વાત એ છે કે, જો કોઈ પુરુષ મૃત્યુના અંતિમ ક્ષણોમાં માત્ર સ્ત્રીનો જ વિચાર કરતો હોય અથવા સ્ત્રી જેવા ગુણો ધરાવતો હોય, તો તેનો આગામી જન્મ સ્ત્રી તરીકે થાય છે. તેવી જ રીતે, જે વ્યક્તિ ભગવાનનું સ્મરણ કરતા દેહત્યાગ કરે છે, તે મોક્ષ અથવા ઉચ્ચ લોકની પ્રાપ્તિ કરે છે.
આ પણ વાંચો: જૂનમાં શુક્ર-ગુરુ યુતિનો મહાસંયોગ! : આ 3 રાશિવાળા માટે ખૂલશે ખજાનો! મળશે જબરદસ્ત પૈસા, પ્રેમ અને સફળતા
પાપના આધારે મળતી સજા અને યોનિઓ
ગરુડ પુરાણમાં જણાવ્યા અનુસાર, વિવિધ પાપો માટે અલગ-અલગ જન્મો નક્કી કરવામાં આવ્યા છે:
ગુરુનું અપમાન: જે શિષ્ય પોતાના ગુરુનું અપમાન કરે છે અથવા તેમની સાથે છેતરપિંડી કરે છે, તેને નરકની યાતના બાદ આગામી જન્મમાં જળરહિત જંગલમાં 'બ્રહ્મરાક્ષસ' તરીકે ભટકવું પડે છે.
છેતરપિંડી અને લૂંટફાટ: બીજાની સંપત્તિ હડપ કરનારા કે લોકોની મજબૂરીનો ફાયદો ઉઠાવનારા લોકો આગામી જન્મમાં સાપ, ઉંદર અથવા અન્ય સરિસૃપ પ્રાણી બને છે.
હિંસા અને કપાત: જે લોકો અકારણ પ્રાણીઓની હત્યા કરે છે અથવા નિર્દોષોને પીડા આપે છે, તેમને પશુ યોનિમાં જન્મ લઈને એ જ પીડા સહન કરવી પડે છે.
મોક્ષનો માર્ગ: કેવી રીતે સુધારશો તમારો પરલોક?
ભગવાન વિષ્ણુ કહે છે કે મનુષ્ય જન્મ એ ઈશ્વરની શ્રેષ્ઠ ભેટ છે. આ જન્મે જ આપણે મોક્ષનો માર્ગ કંડારી શકીએ છીએ. ગરુડ પુરાણ મુજબ, દાન, પુણ્ય, સત્યનું પાલન અને જરૂરિયાતમંદોની સેવા કરવાથી જૂના પાપોનું શમન થાય છે. ગાયની સેવા, તુલસી પૂજન અને ધર્મ ગ્રંથોનું વાચન વ્યક્તિના આત્માને શુદ્ધ કરે છે, જેથી મૃત્યુ બાદ તેને યમદૂતોનો ભય રહેતો નથી અને પિતૃઓનો પણ આશીર્વાદ મળે છે.
