વિશ્વભરના ફૂટબોલ ચાહકો જે મેચની આતુરતાથી રાહ જોઈ રહ્યા હતા તે ક્ષણ હવે આવી પહોંચી છે. FIFA ફૂટબોલ વર્લ્ડ કપ 2026ની ફાઈનલમાં આજે સ્પેન અને આર્જેન્ટિના વચ્ચે મહાસંગ્રામ રમાશે. ન્યૂયોર્કના ન્યૂ જર્સી સ્ટેડિયમમાં ભારતીય સમય અનુસાર રાત્રે 12:30 વાગ્યે શરૂ થનારી આ ફાઈનલ અનેક ઐતિહાસિક પળોની સાક્ષી બનવાની છે. 60 વર્ષ બાદ બંને ટીમો વર્લ્ડ કપમાં ફરી એકવાર આમને-સામને આવી રહી છે, જ્યારે પ્રથમ વખત વર્લ્ડ કપની ફાઈનલમાં તેમની ટક્કર જોવા મળશે.
60 વર્ષ બાદ વર્લ્ડ કપમાં ફરી ટક્કર
સ્પેન અને આર્જેન્ટિના વચ્ચે અત્યાર સુધી કુલ 14 આંતરરાષ્ટ્રીય મુકાબલા રમાયા છે. બંને ટીમોએ 6-6 મેચમાં જીત મેળવી છે, જ્યારે 2 મેચ ડ્રો રહી છે. આ આંકડા બંને ટીમોની સમાન તાકાત દર્શાવે છે.
વર્લ્ડ કપના ઈતિહાસમાં બંને વચ્ચે અત્યાર સુધી માત્ર એક જ મેચ રમાઈ હતી. વર્ષ 1966ના વર્લ્ડ કપમાં આર્જેન્ટિનાએ સ્પેનને 2-1થી હરાવ્યું હતું. હવે લગભગ 60 વર્ષ બાદ બંને ટીમો ફરી વર્લ્ડ કપમાં ટકરાશે અને આ વખતે દાવ પર વિશ્વ ચેમ્પિયન બનવાનો ગૌરવ રહેશે.
છેલ્લે બંને ટીમો વર્ષ 2018ની ફ્રેન્ડલી મેચમાં આમને-સામને આવી હતી, જેમાં સ્પેને આર્જેન્ટિનાને 6-1થી હરાવ્યું હતું.
સ્પેન સામે ઈતિહાસ રચવાની તક, આર્જેન્ટિના સામે સતત બીજી ટ્રોફીનું લક્ષ્ય
સ્પેન માટે આ ફાઈનલ ખૂબ જ મહત્વપૂર્ણ છે. ટીમ 2010 બાદ બીજી વખત FIFA વર્લ્ડ કપ જીતવાનું સપનું સાકાર કરવા મેદાનમાં ઉતરશે.
બીજી તરફ ડિફેન્ડિંગ ચેમ્પિયન આર્જેન્ટિના પાસે ચોથી વખત વિશ્વ ચેમ્પિયન બનવાની સાથે સતત બીજી વખત વર્લ્ડ કપ જીતવાનો મોકો છે.
જો આર્જેન્ટિના આ ફાઈનલ જીતશે તો તે ઈટાલી (1938) અને બ્રાઝિલ (1962) બાદ સતત બે વર્લ્ડ કપ જીતનારી ઈતિહાસની ત્રીજી ટીમ બની જશે.
મેસ્સી અને યમાલની કહાની બની ચર્ચાનો વિષય
આ ફાઈનલ માત્ર બે ટીમો વચ્ચેનો જ મુકાબલો નથી, પરંતુ બે પેઢીઓ વચ્ચેનો સંઘર્ષ પણ માનવામાં આવી રહ્યો છે.
આશરે 19 વર્ષ પહેલાં, બાર્સિલોનામાં યોજાયેલા એક ચેરિટી ફોટોશૂટ દરમિયાન તે સમયે 20 વર્ષીય લિઓનેલ મેસ્સીએ માત્ર ત્રણ મહિનાના લેમિન યમાલને ખોળામાં લઈને તસવીર પડાવી હતી.
વર્ષ 2024માં આ તસવીર સોશિયલ મીડિયા પર ખૂબ વાયરલ થઈ હતી. હવે એ જ યમાલ પ્રથમ વખત આંતરરાષ્ટ્રીય સ્તરે પોતાના બાળપણના આઈડલ મેસ્સી સામે વર્લ્ડ કપની ફાઈનલમાં રમશે. આ ઘટનાને ફૂટબોલ ઈતિહાસની સૌથી ભાવનાત્મક અને ચર્ચિત કહાનીઓમાંની એક માનવામાં આવી રહી છે.
ગોલ્ડન બૂટની રેસમાં એમ્બાપ્પે આગળ
આ ટૂર્નામેન્ટમાં વ્યક્તિગત પ્રદર્શનની વાત કરીએ તો કિલિયન એમ્બાપ્પે ગોલ્ડન બૂટની રેસમાં સૌથી આગળ છે. તેણે અત્યાર સુધી 10 ગોલ અને 4 આસિસ્ટ નોંધાવ્યા છે.
આર્જેન્ટિનાના સુપરસ્ટાર લિઓનેલ મેસ્સી બીજા ક્રમે છે. મેસ્સીએ અત્યાર સુધી 8 ગોલ અને 4 આસિસ્ટ કર્યા છે અને ફાઈનલમાં તેમનું પ્રદર્શન ગોલ્ડન બૂટની રેસમાં પણ મહત્વપૂર્ણ બની શકે છે.
સ્પેન તરફથી મિકેલ ઓયારઝાબાલ 5 ગોલ સાથે ટીમના ટોપ સ્કોરર છે, જ્યારે માત્ર 19 વર્ષીય લેમિન યમાલ 30 સફળ ડ્રિબલ સાથે સમગ્ર ટૂર્નામેન્ટના સૌથી પ્રભાવશાળી વિંગર તરીકે ઉભરી આવ્યો છે.
બંને ટીમો પાસે છે મજબૂત સંતુલન
આર્જેન્ટિના અનુભવી ખેલાડીઓ અને મોટા મેચના દબાણને સંભાળવાની ક્ષમતા માટે જાણીતી છે, જ્યારે સ્પેન યુવા ખેલાડીઓ, ઝડપી પાસિંગ ફૂટબોલ અને આક્રમક રમત માટે ઓળખાય છે.
એક તરફ મેસ્સીનો અનુભવ અને નેતૃત્વ રહેશે તો બીજી તરફ યમાલ, ઓયારઝાબાલ અને સ્પેનના યુવા ખેલાડીઓ ટીમને નવી ઊર્જા આપશે. બંને ટીમોએ સમગ્ર ટૂર્નામેન્ટ દરમિયાન શાનદાર પ્રદર્શન કરીને ફાઈનલમાં સ્થાન મેળવ્યું છે.
