Dharmendra Pradhan Resignation CJP Protest: કેન્દ્રીય શિક્ષણમંત્રી ધર્મેન્દ્ર પ્રધાનના રાજીનામાની જાહેરાત બાદ રાજકીય અને શૈક્ષણિક વર્તુળોમાં ચર્ચાનો માહોલ ગરમાયો છે. છેલ્લા ઘણા દિવસોથી દિલ્હીના જંતર-મંતર ખાતે ચાલી રહેલા વિરોધ પ્રદર્શન વચ્ચે આવેલા આ રાજીનામાને કેટલાક વર્ગો આંદોલનની મહત્વપૂર્ણ સિદ્ધિ તરીકે જોઈ રહ્યા છે. જોકે, વિરોધ પ્રદર્શનનું નેતૃત્વ કરી રહેલી કોકરોચ જનતા પાર્ટી (CJP)એ સ્પષ્ટ કરી દીધું છે કે માત્ર રાજીનામાથી તેમનું આંદોલન સમાપ્ત થવાનું નથી. CJPના પ્રમુખ અભિજિત દીપકેએ જણાવ્યું કે, શિક્ષણમંત્રીના રાજીનામા સાથે તેમની એક માંગણી પૂર્ણ થઈ છે, પરંતુ અન્ય મહત્વપૂર્ણ મુદ્દાઓ પર સરકાર તરફથી કાર્યવાહી બાકી છે. તેમણે જણાવ્યું કે બાકી રહેલી માંગણીઓ સ્વીકારવામાં નહીં આવે ત્યાં સુધી જંતર-મંતર પરનું આંદોલન ચાલુ રહેશે.
રાજીનામા બાદ CJPએ શું કહ્યું?
ધર્મેન્દ્ર પ્રધાનના રાજીનામાની માહિતી સામે આવ્યા બાદ અભિજિત દીપકેએ મીડિયા સાથે વાત કરતાં કહ્યું કે આંદોલનની આ માત્ર શરૂઆતની સફળતા છે. તેમણે દાવો કર્યો કે સતત વિરોધ અને દબાણના કારણે સરકારને આ નિર્ણય લેવો પડ્યો છે. દીપકેએ કહ્યું કે, ઘણા લોકો સતત કહેતા હતા કે સરકાર ક્યારેય રાજીનામું નહીં આપે, પરંતુ હવે આ ઘટનાએ બતાવી દીધું છે કે લોકશાહીમાં સતત અને શાંતિપૂર્ણ વિરોધથી પરિણામ મેળવી શકાય છે. તેમણે આને લોકશાહી માટે સકારાત્મક સંદેશ ગણાવ્યો.
CJPની બાકી રહેલી મુખ્ય માંગણીઓ
અભિજિત દીપકે જણાવ્યું કે, સંગઠનની કેટલીક મહત્વપૂર્ણ માંગણીઓ હજુ અધૂરી છે અને તે પૂર્ણ ન થાય ત્યાં સુધી વિરોધ ચાલુ રહેશે. તેમની પ્રથમ માંગણી એવી છે કે, પેપર લીક પ્રકરણના કારણે આત્મહત્યા કરનાર વિદ્યાર્થીઓના પરિવારોને રૂ.1 કરોડનું વળતર આપવામાં આવે. તેમના મતે આવી દુર્ઘટનાઓથી પ્રભાવિત પરિવારોને સરકાર તરફથી આર્થિક સહાય મળવી જોઈએ. બીજી માંગણી મુજબ વિરોધ પ્રદર્શનમાં જોડાયેલા વિદ્યાર્થીઓ સામે નોંધાયેલા તમામ કેસ પાછા ખેંચવામાં આવે અને તેમના વિરુદ્ધ કોઈ શિસ્તભંગ અથવા કાનૂની કાર્યવાહી ન કરવામાં આવે. ત્રીજી માંગણી 20 જુલાઈના વિરોધ દરમિયાન વિદ્યાર્થીઓ પર બળપ્રયોગ કરનાર પોલીસ અને સુરક્ષા અધિકારીઓ સામે કાર્યવાહી કરવાની છે. દીપકેએ કહ્યું કે,સંબંધિત અધિકારીઓએ વિદ્યાર્થીઓ પાસે જાહેરમાં માફી માંગવી જોઈએ અને ઘટનાની જવાબદારી નક્કી કરવી જોઈએ.
આ પણ વાંચો: 'ધર્મેન્દ્ર પ્રધાનનું રાજીનામું યુવાનોની જીત' : AAP-કોંગ્રેસ સહિત વિરોધ પક્ષની તીવ્ર પ્રતિક્રિયા
"આ લોકશાહીની જીત છે"
અભિજિત દીપકેએ પોતાના નિવેદનમાં કહ્યું કે આ રાજીનામું એ વાતનો પુરાવો છે કે જો નાગરિકો લોકશાહી પદ્ધતિથી પોતાના અધિકારો માટે અડગ રહે તો સરકારને પણ નિર્ણય બદલવો પડે છે. તેમણે જણાવ્યું કે, છેલ્લા ઘણા દિવસોથી સતત એક જ પ્રશ્ન પૂછવામાં આવતો હતો કે શું સરકાર રાજીનામું આપશે? હવે થયેલા વિકાસથી સ્પષ્ટ થયું છે કે શાંતિપૂર્ણ આંદોલન પણ અસરકારક બની શકે છે. તેમણે કાર્યકરોને સંદેશ આપ્યો કે લોકશાહીમાં ડરવાને બદલે બંધારણીય રીતે પોતાના અધિકારો માટે અવાજ ઉઠાવવો જોઈએ.
આંદોલન આગળ પણ ચાલુ રહેશે
CJPએ સ્પષ્ટ કર્યું છે કે, શિક્ષણમંત્રીના રાજીનામા પછી પણ જંતર-મંતર પરનું વિરોધ પ્રદર્શન સમાપ્ત કરવામાં આવશે નહીં. સંગઠનનું કહેવું છે કે, જ્યાં સુધી પીડિત પરિવારોને વળતર, વિદ્યાર્થીઓ સામેના કેસ પાછા ખેંચવા અને પોલીસ કાર્યવાહી અંગે યોગ્ય નિર્ણય લેવામાં નહીં આવે ત્યાં સુધી તેમનો વિરોધ ચાલુ રહેશે. આ સમગ્ર ઘટનાક્રમ બાદ હવે સરકાર બાકી રહેલી માંગણીઓ પર શું વલણ અપનાવે છે અને આંદોલન કઈ દિશામાં આગળ વધે છે તેના પર સૌની નજર રહેશે.
