ગુજરાત સહિત આ રાજ્યોમાં છે વેકેન્સી : પોસ્ટ ઓફિસમાં નીકળી બંપર ભરતી; 10 પાસે ઉમેદવારો માટે સોનેરી તક

India Post GDS Recruitment 2025: ભારતીય ટપાલ વિભાગે ગ્રામીણ ડાક સેવક (GDS-2025) ની 21,413 જગ્યાઓ માટે બમ્પર ભરતી બહાર પાડી છે. 10 પાસ ઉમેદવારો આ જગ્યાઓ માટે ઓનલાઈન અરજી કરી શકે છે. આ ભરતી માટેની અરજી પ્રક્રિયા 10 ફેબ્રુઆરી 2025 થી શરૂ થઈ છે અને રસ ધરાવતા ઉમેદવારો 3 માર્ચ 2025 સુધી અરજી કરી શકે છે. પછી 6 માર્ચથી 8 માર્ચ, 2025 વચ્ચે અરજી ફોર્મમાં સુધારા કરી શકાશે. આ ભરતી સમગ્ર દેશમાં 23 સર્કલમાં થઈ રહી છે, જેમાંથી ઉત્તર પ્રદેશ, મધ્ય પ્રદેશ, કેરળ, તમિલનાડુ, ઓડિશા, કર્ણાટક, આસામ, ગુજરાત અને આંધ્ર પ્રદેશમાં સૌથી વધુ પોસ્ટ્સ ઉપલબ્ધ છે. ઉમેદવારો સત્તાવાર વેબસાઇટ https://indiapostgdsonline.gov.in/ પર જઈને અરજી કરી શકે છે.

આ રાજ્યોમાં છે સૌથી વધુ પોસ્ટ્સ
આ ભરતીમાં ઉત્તર પ્રદેશમાં 3004, તમિલનાડુમાં 2292, આસામમાં 1870, કેરળમાં 1385, ગુજરાતમાં 1203, આંધ્રપ્રદેશમાં 1215, કર્ણાટકમાં 1135 અને ઓડિશામાં 1101 જગ્યાઓનો સમાવેશ થાય છે. આ ઉપરાંત પશ્ચિમ બંગાળ, બિહાર, મધ્યપ્રદેશ, ઉત્તરાખંડ, તેલંગાણા, પંજાબ, ઝારખંડ, છત્તીસગઢ, હિમાચલ પ્રદેશ, જમ્મુ-કાશ્મીર અને દિલ્હીમાં પણ ભરતી કરવામાં આવશે. અરજી કરવા માટે ઉમેદવારને તે રાજ્યની સ્થાનિક ભાષાનું જ્ઞાન હોવું આવશ્યક છે જ્યાં તેઓ અરજી કરી રહ્યા છે.

અરજી કરવા માટે કેટલી હોવી જોઈએ ઉંમર?
આ જગ્યાઓ માટે અરજી કરવા માટે ઉમેદવારે 10મું પાસ કરેલ હોવું જરૂરી છે. અરજદારની લઘુત્તમ વય 18 વર્ષ અને મહત્તમ વય 40 વર્ષ હોવી જોઈએ. સરકારી નિયમો મુજબ અનામત વર્ગના ઉમેદવારોને વયમાં છૂટછાટ આપવામાં આવશે. અરજી ફી ₹100 રાખવામાં આવી છે, પરંતુ મહિલા ઉમેદવારો, SC/ST, દિવ્યાંગ અને ટ્રાન્સવુમન કેટેગરીના અરજદારોને ફીમાંથી મુક્તિ આપવામાં આવી છે. ક્રેડિટ/ડેબિટ કાર્ડ, નેટ બેન્કિંગ અને UPI જેવા ઑનલાઇન મોડ દ્વારા ફી ચૂકવી શકાય છે.

તમને કેટલો મળશે પગાર?
ગ્રામીણ ડાક સેવકો (GDS) ને "ટાઈમ રિલેટેડ કંટિન્યૂટી એલાઉન્સ (TRCA)" હેઠળ ચૂકવવામાં આવશે. આ મુજબ બ્રાન્ચ પોસ્ટ માસ્ટર (BPM) નો પગાર દર મહિને ₹12,000 થી ₹29,380 હશે. આ ભરતી સંબંધિત વધુ માહિતી માટે ઉમેદવારો ઈન્ડિયા પોસ્ટની સત્તાવાર વેબસાઈટની મુલાકાત લઈ શકે છે. સરકારી નોકરી મેળવવાની આ એક શ્રેષ્ઠ તક છે, ખાસ કરીને એવા યુવાનો માટે કે જેઓ 10મું પાસ કર્યું છે અને સરકારી નોકરીની તૈયારી કરી રહ્યા છે.