જ્યોતિષશાસ્ત્રમાં બુદ્ધિ અને તર્કના કારક ગણાતા બુધ ગ્રહે 3 ફેબ્રુઆરીના રોજ કુંભ રાશિમાં પ્રવેશ કર્યો છે. આગામી 10 એપ્રિલ 2026 સુધી બુધ આ રાશિમાં બિરાજમાન રહીને દેશ દુનિયા સહિત તમામ રાશિઓ પર વ્યાપક અસર કરશે. શનિની માલિકીની કુંભ રાશિમાં બુધનું આ સંચરણ આર્થિક દૃષ્ટિકોણથી અત્યંત મહત્વનું સાબિત થશે. જ્યોતિષીઓના મતે બુધ વ્યાપાર અને સંવાદનો ગ્રહ હોવાથી આ સમયગાળામાં લોકોના વિચારોમાં આધુનિકતા જોવા મળશે અને જ્ઞાન આધારિત ક્ષેત્રોમાં મોટો ફાયદો થઈ શકે છે.
વક્રી અને માર્ગી ચાલની અસર
બુધ ગ્રહ કુંભ રાશિમાં રહીને જ 26 ફેબ્રુઆરીએ વક્રી થશે અને ત્યારબાદ 21 માર્ચના રોજ ફરી માર્ગી ચાલ શરૂ કરશે. અંતે 10 એપ્રિલે બુધ મીન રાશિમાં પ્રસ્થાન કરશે. આ ફેરફારોને કારણે રોકાણ અને નાણાકીય લેવડદેવડમાં સાવધાની રાખવી જરૂરી છે. ખાસ કરીને શેરબજાર, વકીલાત અને પત્રકારત્વ સાથે જોડાયેલા લોકો પર આ ગોચરની સીધી અસર જોવા મળશે. કેટલાક લોકો માટે આર્થિક અવરોધો આવી શકે છે તો કેટલાક માટે પ્રોપર્ટીમાં રોકાણ ફાયદાકારક રહેશે.
રાહુ અને શુક્ર સાથેની યુતિથી બનશે વિશેષ યોગ
કુંભ રાશિમાં બુધના પ્રવેશની સાથે જ ત્યાં અગાઉથી હાજર રાહુ સાથે તેની યુતિ સર્જાઈ છે જેનાથી ‘જડત્વ યોગ’નું નિર્માણ થયું છે. સામાન્ય રીતે આ યોગને નકારાત્મક ગણવામાં આવે છે પરંતુ વર્તમાન સમયની રાજદ્વારી પરિસ્થિતિમાં તે મેષ અને મિથુન જેવી રાશિઓ માટે લાભદાયક રહી શકે છે. આ ઉપરાંત 6 ફેબ્રુઆરીથી શુક્ર પણ આ રાશિમાં ભળતા ‘ત્રિગ્રહી યોગ’ અને ત્યારબાદ સૂર્ય તથા મંગળના આગમનથી ‘પંચગ્રહી યોગ’ રચાશે. આ ગ્રહદશાને કારણે પ્રેમ સંબંધો અને આર્થિક નિર્ણયોમાં ભારે અફરાતફરી જોવા મળી શકે છે.
વૈશ્વિક બજાર અને સામાન્ય જનજીવન પર પ્રભાવ
આંતરરાષ્ટ્રીય સ્તરે વિવિધ દેશો વચ્ચે આયાત નિકાસના નવા કરારો થવાની સંભાવના છે. કેટલાક શક્તિશાળી દેશો પોતાની વ્યાપારિક નીતિઓમાં મોટો ફેરફાર કરી શકે છે. બુધના પ્રભાવથી મોંઘવારી પર અંકુશ આવશે અને અનાજના ભાવમાં સ્થિરતા જોવા મળશે. ખેતી ક્ષેત્રે શાકભાજી અને દૂધનું ઉત્પાદન વધવાથી ખેડૂતોની આવકમાં વૃદ્ધિ થશે. વિદ્યાર્થીઓ માટે આ સમયગાળો શિક્ષણમાં નવી ઊંચાઈઓ સર કરવા માટે ઉત્તમ સાબિત થશે.
બુધના અશુભ પ્રભાવને રોકવાના ઉપાયો
જે લોકોની કુંડળીમાં બુધ નબળો હોય તેમણે દર બુધવારે ગાયને લીલું ઘાસ ખવડાવવું જોઈએ. ગણેશજીને સિંદૂર અને દૂર્વાની 21 ગાંઠ અર્પણ કરવાથી મુશ્કેલીઓ દૂર થાય છે. આ ઉપરાંત મગની દાળ અથવા પાલકનું દાન કરવું અને કન્યા પૂજન કરીને લીલી વસ્તુઓની ભેટ આપવી અત્યંત ફળદાયી માનવામાં આવે છે.
તમામ 12 રાશિઓ પર એક નજર
મેષ: અટકેલા કાર્યો વેગ પકડશે અને કાર્યક્ષેત્રમાં નવી સિદ્ધિઓ પ્રાપ્ત થશે.
વૃષભ: બુદ્ધિશાળી નિર્ણયોથી ધનલાભ થશે અને રોકાયેલા નાણાં પરત મળશે.
મિથુન: આત્મવિશ્વાસમાં વધારો થશે અને પ્રગતિની નવી તકો સાંપડશે.
કર્ક: વ્યાપારમાં વિસ્તરણ થશે અને સંશોધન કાર્યમાં સફળતા મળશે.
સિંહ: સ્વાસ્થ્ય બાબતે સાવધ રહેવું અને વાદવિવાદથી દૂર રહેવું હિતાવહ છે.
કન્યા: ભાગીદારીના કામમાં સફળતા મળશે અને દામ્પત્ય જીવન મધુર બનશે.
તુલા: ઉચ્ચ શિક્ષણમાં પ્રગતિ થશે અને સારા સમાચાર મળી શકે છે.
વૃશ્ચિક: માતાના સ્વાસ્થ્યનું ધ્યાન રાખવું અને પારિવારિક સુખમાં વધારો થશે.
ધનુ: કાર્યસ્થળ પર ઉપરી અધિકારીઓ તરફથી પ્રશંસા અને સન્માન મળશે.
મકર: આર્થિક સ્થિતિ મજબૂત બનશે અને મિલકતમાં વધારો થવાના યોગ છે.
કુંભ: સાહસ અને પરાક્રમ વધશે પરંતુ પોતાના સ્વાસ્થ્યની કાળજી લેવી જરૂરી છે.
મીન: સુખ સુવિધાઓ પાછળ ખર્ચ વધશે અને જોખમી રોકાણથી બચવું જોઈએ.
