Ashok Pathak: લોકપ્રિય વેબ સિરીઝ ‘પંચાયત’માં ‘વિનોદ’નું પાત્ર ભજવીને જાણીતા બનેલા અભિનેતા અશોક પાઠકે તાજેતરમાં PM નરેન્દ્ર મોદી સાથે થયેલી મુલાકાતની યાદો શેર કરી છે. અભિનેતાએ કહ્યું કે તેમણે ક્યારેય વિચાર્યું નહોતું કે દેશના વડાપ્રધાન સાથે આટલી સરળ અને આત્મીય રીતે વાતચીત થશે. તેમના જણાવ્યા મુજબ, PM મોદીની હ્યુમર સેન્સ અને યાદશક્તિ બંને ખરેખર પ્રભાવિત કરનારી છે.
‘એટલી નોર્મલ વાતચીત થશે એવું વિચાર્યું નહોતું’
‘મોદી સ્ટોરી’ નામના X (પૂર્વે ટ્વિટર) એકાઉન્ટ પર શેર કરાયેલા વીડિયોમાં અશોક પાઠક કહે છે, “સાચું કહું તો મેં ક્યારેય વિચાર્યું નહોતું કે વડાપ્રધાન સાથે આટલી સામાન્ય રીતે વાત થશે. PM મોદીનો હ્યુમર અને તેમની યાદશક્તિ બંને નેક્સ્ટ લેવલના છે. અમે તો માત્ર હસતા જ રહી ગયા.” તેમણે વધુમાં ઉમેર્યું કે લોકો સાથે જોડાવાની વડાપ્રધાનની રીત ખરેખર અનોખી છે અને દરેકને સહજ અનુભવ કરાવે છે.
‘પંચાયત સાંભળે છે કે નહીં?’
નવી દિલ્હીમાં યોજાયેલા એક કાર્યક્રમ દરમિયાન વડાપ્રધાન નરેન્દ્ર મોદીએ અશોક પાઠક અને દુર્ગેશ કુમારનું ઉષ્માભર્યું સ્વાગત કર્યું હતું. આ દરમિયાન તેમણે હળવા અંદાજમાં પૂછ્યું હતું, “પંચાયત સાંભળે છે કે નહીં?” આ ક્ષણનો વીડિયો સોશિયલ મીડિયા પર ખૂબ વાયરલ થયો હતો. અશોક પાઠકે એ પણ જણાવ્યું કે તેમને ખૂબ આનંદ થયો જ્યારે વડાપ્રધાને પોતાની એક જાહેર સભામાં ‘સુન રહા હૈ બિનોદ’ ડાયલોગનો ઉલ્લેખ કર્યો હતો. આ ડાયલોગ ‘પંચાયત’ સિરીઝના સૌથી લોકપ્રિય સંવાદોમાંનો એક છે.
આ પણ વાંચો: 18 વર્ષ બાદ 'તારક મહેતા...'માં મોટો ટ્વિસ્ટ? : જેઠાલાલના રોલ પર ચાલશે કાતર? જાણો શું છે સમગ્ર મામલો
‘પંચાયત’નો પાંચમો સીઝન પણ આવશે
‘પંચાયત’ વેબ સિરીઝના અત્યાર સુધી ચાર સીઝન રિલીઝ થઈ ચૂક્યા છે અને તેને દર્શકો તરફથી જબરદસ્ત પ્રતિસાદ મળ્યો છે. હવે સિરીઝનો પાંચમો સીઝન પણ આ વર્ષે દર્શકો સામે આવવાનો છે.
આ સિરીઝમાં જીતેન્દ્ર કુમાર, નીના ગુપ્તા, રઘુવીર યાદવ, અશોક પાઠક, દુર્ગેશ કુમાર સહિત અનેક કલાકારો મહત્વપૂર્ણ ભૂમિકામાં જોવા મળે છે. ગામડાના જીવનને સરળ અને રસપ્રદ અંદાજમાં રજૂ કરતી આ સિરીઝે OTT પર પોતાની અલગ ઓળખ બનાવી છે.
આ પણ વાંચો: "હદમાં રહીને વાત કરો... ફાલતૂ વાતો મારી સાથે નહીં" : પાપારાઝી પર કેમ ફૂટ્યો ઝરીન ખાનનો ગુસ્સો?
રસપ્રદ વાતો ચાહકો માટે ખાસ આકર્ષણનું કેન્દ્ર
‘પંચાયત’ દેશની સૌથી લોકપ્રિય વેબ સિરીઝમાંની એક બની ગઈ છે. આવી સ્થિતિમાં તેના કલાકારો અને વડાપ્રધાન વચ્ચેની મુલાકાત તેમજ તેની પાછળની રસપ્રદ વાતો ચાહકો માટે ખાસ આકર્ષણનું કેન્દ્ર બની છે.
