IPL News: IPL ફ્રેન્ચાઇઝી દિલ્હી કેપિટલ્સના વિકેટકીપર-બેટ્સમેન અને બંગાળના યુવા ક્રિકેટર અભિષેક પોરેલ કાનૂની મુશ્કેલીમાં સપડાયા છે. મેડિકલ વિદ્યાર્થીની દ્વારા નોંધાવવામાં આવેલી ગંભીર ફરિયાદના આધારે કલકત્તા હાઈકોર્ટે પોલીસને અભિષેક પોરેલ અને અન્ય એક આરોપીની તાત્કાલિક ધરપકડ કરવાનો આદેશ આપ્યો છે. કેસમાં દુષ્કર્મ, મારપીટ, ગુનાહિત ધમકી સહિતના ગંભીર બિનજામીનપાત્ર ગુનાઓની કલમો હેઠળ તપાસ ચાલી રહી છે. હાઈકોર્ટે તપાસમાં વિલંબ અંગે પણ ગંભીર નોંધ લીધી છે અને આરોપીઓના મોબાઇલ ફોન તથા અન્ય ઇલેક્ટ્રોનિક ઉપકરણો જપ્ત કરવા પણ નિર્દેશ આપ્યો છે, જેથી ફરિયાદી સાથે સંબંધિત ખાનગી તસવીરો કે વીડિયો જાહેર ન થાય. આ સમગ્ર મામલાએ ક્રિકેટ જગતમાં પણ ચર્ચા જગાવી છે. એક તરફ કોર્ટે પોલીસને તાત્કાલિક કાર્યવાહી કરવા કહ્યું છે, તો બીજી તરફ અભિષેક પોરેલે પોતાના પર લાગેલા તમામ આરોપોને સંપૂર્ણપણે નકારી કાઢ્યા છે. હાલ કેસની તપાસ ચાલુ હોવાથી આરોપોની સત્યતા અંગે અંતિમ નિર્ણય કોર્ટની પ્રક્રિયા પૂર્ણ થયા બાદ જ સ્પષ્ટ થશે.
શું છે સમગ્ર મામલો?
હુગલી જિલ્લાના મોગરા પોલીસ સ્ટેશનમાં નોંધાયેલી ફરિયાદ મુજબ, ફરિયાદી મેડિકલ વિદ્યાર્થીનીએ આરોપ લગાવ્યો છે કે, છેલ્લા લગભગ ત્રણ વર્ષથી તે અને અભિષેક પોરેલ વચ્ચે પ્રેમ સંબંધ હતો. આ દરમિયાન પોરેલે લગ્ન કરવાની ખાતરી આપીને તેની સાથે શારીરિક સંબંધ બાંધ્યા હતા. ફરિયાદમાં વધુમાં દાવો કરવામાં આવ્યો છે કે બાદમાં પોરેલે લગ્ન કરવાની ના પાડી હતી. મહિલાએ વિરોધ કરતાં તેની સાથે મારપીટ કરવામાં આવી હતી અને તેને જાનથી મારી નાખવાની ધમકી આપવામાં આવી હતી. ફરિયાદમાં ખાનગી તસવીરો અને વીડિયોનો ઉપયોગ કરીને બ્લેકમેઇલ કરવાનો પણ આરોપ લગાવવામાં આવ્યો છે. આ આધારે પોલીસે ભારતીય ન્યાય સંહિતા (BNS) હેઠળ વિવિધ ગંભીર કલમો મુજબ ગુનો નોંધ્યો છે.
હાઈકોર્ટની કડક ટિપ્પણી અને મહત્વના આદેશ
કેસની સુનાવણી દરમિયાન ફરિયાદી પક્ષે દલીલ કરી હતી કે તપાસ એજન્સીએ હજુ સુધી આરોપીઓના મોબાઇલ ફોન અને અન્ય ઇલેક્ટ્રોનિક ડિવાઇસ જપ્ત કર્યા નથી, જેના કારણે ફરિયાદીની ખાનગી માહિતી લીક થવાનો ભય છે. આ દલીલોને ધ્યાનમાં રાખીને ન્યાયમૂર્તિ સૌગત ભટ્ટાચાર્યે મોગરા પોલીસને અભિષેક પોરેલ અને અન્ય આરોપીની તાત્કાલિક ધરપકડ કરવાનો તેમજ તેમના તમામ ઇલેક્ટ્રોનિક ઉપકરણો જપ્ત કરવાનો આદેશ આપ્યો છે. સાથે જ તપાસની પ્રગતિ અંગે કોર્ટમાં વિગતવાર અહેવાલ રજૂ કરવાનો પણ નિર્દેશ આપવામાં આવ્યો છે.
આ પણ વાંચો: ચઢાવા ચોરી બાદ રામ મંદિર ટ્રસ્ટનો મોટો નિર્ણય! : હવે દર મહિને વેબસાઇટ પર જાહેર થશે ઓડિટ રિપોર્ટ
અભિષેક પોરેલે શું કહ્યું?
હાલ બેંગલુરુમાં હોવાનો દાવો કરનાર અભિષેક પોરેલે તમામ આરોપોને પાયાવિહોણા અને ખોટા ગણાવ્યા છે. મીડિયા સાથેની વાતચીતમાં તેણે જણાવ્યું કે, તે હાલમાં પોતાની ક્રિકેટ કારકિર્દી પર ધ્યાન કેન્દ્રિત કરી રહ્યો છે અને તેને બદનામ કરવા માટે આ પ્રકારના આરોપો લગાવવામાં આવી રહ્યા છે. પોરેલે કહ્યું કે, તપાસ પૂર્ણ થયા બાદ અને કાનૂની પ્રક્રિયા અનુસાર યોગ્ય સમયે તે પોતાનો વિગતવાર પક્ષ રજૂ કરશે. હાલ સુધી તેના તરફથી કોઈ સત્તાવાર કાનૂની નિવેદન જાહેર કરવામાં આવ્યું નથી.
કોણ છે અભિષેક પોરેલ?
23 વર્ષીય અભિષેક પોરેલ ડાબોડી બેટ્સમેન અને વિકેટકીપર તરીકે ઓળખાય છે. વર્ષ 2023થી તે IPLમાં દિલ્હી કેપિટલ્સ તરફથી રમી રહ્યો છે અને છેલ્લા કેટલાક સમયથી ટીમનો મહત્વનો ખેલાડી રહ્યો છે. ઘરેલુ ક્રિકેટમાં તેણે બંગાળનું પ્રતિનિધિત્વ કર્યું છે અને ફર્સ્ટ-ક્લાસ તથા લિસ્ટ-એ ક્રિકેટમાં નોંધપાત્ર પ્રદર્શન કર્યું છે. ઉપરાંત તે ઈન્ડિયા-એ ટીમ સાથે વિદેશ પ્રવાસ પણ કરી ચૂક્યો છે, જેના કારણે ભારતીય ક્રિકેટના ઉભરતા પ્રતિભાશાળી ખેલાડીઓમાં તેની ગણના થતી હતી.
તપાસ હજુ ચાલુ, આરોપો સાબિત થયા નથી
મહત્વનું છે કે હાલ આ કેસ તપાસના તબક્કામાં છે. ફરિયાદીના આરોપોના આધારે હાઈકોર્ટે તપાસને ઝડપી બનાવવા માટે પોલીસને જરૂરી કાર્યવાહી કરવાનો આદેશ આપ્યો છે. બીજી તરફ અભિષેક પોરેલે તમામ આરોપોને નકારી કાઢ્યા છે. કોર્ટમાં કેસની આગળની સુનાવણી દરમિયાન તપાસમાં સામે આવતા પુરાવા અને બંને પક્ષની દલીલોના આધારે આગળની કાનૂની કાર્યવાહી નક્કી થશે. તેથી હાલના તબક્કે આરોપોને અંતિમ સત્ય તરીકે નહીં પરંતુ તપાસ હેઠળના આરોપો તરીકે જ જોવામાં આવે.
